【武术01】变变变生命力：袋鼠格斗术

“唔系卦，袋鼠都关你事？”
其实真系唔太关事

最近有段“街交”片好多人睇，大家知我唔钟意街交，所以我就本应唔讲嘅。不过因为肇事者系只袋鼠，决定同大家讲下。

首先讲明，我都系睇片分析，真袋鼠都只系喺动物园见过，更枉论交过手。再者，大家都唔应该无啦啦伤害动物。

不过，如果他朝有一日，突然有袋鼠一言不发，就过嚟打你，虽然你知佢应该系点错相，但讲极佢都唔听。咁以下落嚟嘅袋鼠技术分析，话唔定可以救你一命。

上身攻击

首先好多人一谂，就谂起袋鼠拳击。袋鼠拳击系澳大利亚常用嘅吉祥物，好多运动队都用。但其实袋鼠好少用拳。

好多时你会见到两只袋鼠打交，都会伸只手出嚟抓人块面。而为咗防止被抓中，佢地都会头向后倾。可以见到佢地只爪都几尖下，抓中眼耳口鼻都几大获。

如果见到袋鼠伸出双手想抓你块面，呢个时候你一系保持距离，一系圈手拍开佢嘅鼠爪手。不幸抓中，就由内向外拍开只手，之后推开佢。

下半身攻击

大家留意到，其实袋鼠最主要嘅攻击手段，系跳起双前撑。仲要唔系侧飞而系直飞。

双飞踢嘅问题在于，踢完系会成个身训落地嘅，唔识用可能仲伤过对手。但系袋鼠因为有条尾嘅关系，就无呢个问题。所以话唔同体格，就有唔同打法。

袋鼠嘅攻击点系对方下盘，打中大腿都无咁伤，如果打中小腹、膝关节、要害嘅话，真系谂起都痛。

双前撑同前撑一样，可以用嚟截击，又因为袋鼠精悍嘅脚，加上可以依靠条尾挨后出脚，前撑嘅距离又变到同截击膝一样。所以如果你想埋身出拳，就好可能会被佢踢中。就好似UFC 178，Eddie Alvarize 对 Donald "Cowboy" Cerrone，Eddie 想埋身出拳就俾Cowboy膝中一样。

其中一个应对方法系靠假动作，用 In and out movement去令只袋鼠先出脚，喺佢踢唔中失平衡或者收脚嘅时候先攻击。

锁技

袋鼠都识锁技？无错，系识嘅，唔知几时开始，袋鼠就识得用RNC（裸绞）。睇片你就明（由30秒开始睇，都几吓人，好彩最后两只袋鼠都无事）：

为快不破

以下呢段片就系最近好多人讲嘅“街交”片。有只狗狗被袋鼠锁紧，主人决定过去救佢（由20秒开始睇）：

可能系觉得自己好劲，又或者睇死对手唔敢打佢，片中只袋鼠系无护头嘅，而主人好快一个jab打埋去，打中之后可以即时见到袋鼠不愤、疑惑、惊讶嘅样子。

而主人喺呢个时候就做咗一个非常好嘅决定：走。救咗狗，只袋鼠又嬲嬲紧，无谓继续纠缠落去。

讲返条片，有人话主人英勇，亦有动物权益团体话咁做唔岩。但果时情况危急，主人都无时间理咁多，出手救狗都系人之常情。最后大家都无事，都系一个好结果。好似主人背后仲有故事，但呢到就唔多讲啦，都系focus返只袋鼠。

至憎人虐待动物

好啦，以上我都系讲下笑，关于点样避免同袋鼠发生冲突，大家应该问问生物学家，唔好以为睇完就可以去打袋鼠。好多野生动物，包括袋鼠，都有攻击性同一定危险性，唔好去招惹佢地呀。

仲有，𠮶种人同动物打交嘅“表演”我都系唔支持嘅。你唔系同佢打交，你只系虐待佢，佢亦无话过想同你打，最后伤到人或者伤到只动物都唔好。想睇搏击，睇拳赛咪得啰。

今日系咁多！

（本文纯属作者意见，不代表香港01立场。）