【足球．博评】从比利到碧咸：美职点止养老咁简单

美国人将运动商业化，相信佢认第二，无人敢认第一！佢哋将唔少运动，包括美式足球、篮球、棒球同冰上曲棍球都搞得好成功，唔止系职业联盟，仲甚至连NCAA高中比赛都可以搞到有声有色。但喺足球界，美国就曾经被称为足球沙漠，而近年MLS嘅发展愈嚟愈快，佢哋嚟到镁光灯前得到关注，其实并非一朝一夕，究竟MLS可唔可以喺美国上升到好似NBA嘅高度？

文：洛迪高@世界波

曾效力英超嘅爱尔兰前锋罗比坚尼（Robbie Keane）宣布离开美职联（MLS）球会洛杉矶银河后，英格兰双特林伯特（Frank Lampard）同谢拉特（Steven Gerrard）都分别离开效力嘅纽约城及洛杉矶银河。不过好彩，仲有唔少球星踢紧（例如韦拿及派路），而且似乎仲会有更多更年轻嘅球星来投！但喺展望未来之前，不如先回顾一下美职过去一段都可谓相当光辉嘅历史……

- 洪荒时期 -

讲紧嘅系唔止未有MLS，仲要系比利（Pele）、碧根鲍华（Franz Beckenbauer）、告鲁夫（Jordi Cruyff）同佐治贝斯（George Best）踢波嘅年代。

当时美职仲系叫“北美足球联赛”，比利喺1975年加入纽约宇宙队，虽然已过最巅峰状态，但表现仍然唔错，出场79次仲可以攻入57球。

比利嘅成功吸引到其他球星其后到美国发展。“凯撒大帝”（碧根鲍华）喺1977年做比利队友，仲踢咗4季，加盟第1季就成为最有价值球员。同期仲有荷兰球王告鲁夫同佐治贝斯加盟洛杉矶Aztecs，令一向喺美国唔太hit嘅足球都一时兴起。

虽然球星们大部分都过晒巅峰时期，去美国养老，但好似纽约宇宙队最受欢迎时期，每场比赛平均有4万人睇，都算喺美国推广到足球。

不过，因为1980年代初经济萧条，球队数量同球员人工却不断急升，搞到大部分球会都蚀本，北美足球联赛终于喺1984年葬身历史洪流。到1996年先出现MLS，但已经唔似1970年代咁受欢迎。

- 万人迷君临 -

直到2007年7月1日，一单堪称全球最轰动嘅转会消息令MLS再次成为焦点：万人迷碧咸（David Beckham）以32岁之龄由皇家马德里转会到洛杉矶银河，令一众觉得咸爷仲可以喺顶级联赛立足嘅人跌晒眼镜（咸爷几次返欧洲踢波都证明佢哋嘅谂法系无错）。咸爷就话想去美国帮手推广足球文化（顺便做响自己品牌，为佢同太太日后发展铺路）。

既然有位大人物嚟到，MLS都不敢怠慢，待遇当然不能太差，但MLS本身设Salary Cap，如果要请球星，其余球员就惟有拣平啲同水准低啲。鉴于此举可能会拖低联赛水平，所以有关方面特意设立“碧咸条例”，容许球队中有3位球员薪金不受Salary Cap限制，以便吸引巨星。

讲起着数，要知道碧咸嘅条款入面，仲包咗一项畀佢以四分一价钱，即2,500万美元买下美职球队特许经营权优惠，而咸爷亦密锣紧鼓喺迈阿密搞新球队踢美职，仲想揾埋伊巴谦莫域添，都算有心啰！

- 巨星纷至 -

碧咸珠玉在前，巨星加盟MLS意欲提高咗唔少，之后唔少球星都选择喺职业生涯较后日子去美职联。其实唔止系出名球星，仲有一啲喺欧洲主流联赛揾过食嘅球员，例如德国门将Frank Rost，甚至系“同喺主流联赛揾过食嘅球员有关系嘅人”，如伊恩胡礼（Ian Wright）个囝囝巴利（Bradley Wright-Phillips），亦即系胡礼菲腊斯（Shaun Wright-Phillips）个细佬，缺乏顶级联赛经验嘅佢仲踢得唔错添，连埋今年，已攞过两次神射手榜第一名！

至于本身系球星嘅，就有加盟纽约红牛嘅亨利（Thierry Henry）同卡希尔（Tim Cahill）、洛杉矶银河嘅罗比坚尼、蒙特利尔冲击嘅杜奥巴（Didier Drogba）、纽约城嘅韦拿（David Villa）、派路（Andrea Pirlo）、奥兰多城嘅卡卡（Kaka）与及文初提及嘅“双特”等等。当然唔止MLS，次级联赛嘅北美足球联赛都吸引到鲁尔（Raul）呢位前西班牙金童来投（当然好大程度系因为纽约宇宙呢支球队）。

虽然开头佢哋都畀人话只系嚟养老同掘金，但其后佢哋专业同球技都可以帮助到球队。其中最具争议嘅林伯特，因为借咗去曼城畀人觉得佢根本唔想踢美职，仲喺MLS初登场时受到不欢迎对待，不过随住呢季入球不断，已渐被接受，仲试过凭帽子戏法赢尽欢呼声！

曼皇大战证美足有得做

其实老将们能够有咁嘅表现已经好难得，试想像下MLS作客旅程，举西岸嘅洛杉矶银河为例，如果佢哋要去作客纽约红牛，要坐5个钟头内陆机，仲要适应3个钟时差……

睇返MLS今季暂时统计平均入座人数有21,692，比上季21,574多少少喇，都叫有进步；电视转播仲劲，ESPN统计今季收看人数有307,845，比上季多成25%！最壮观嘅系喺2014年季前赛曼联对皇家马德里，多达109,000球迷去咗密歇根球场睇波！

然而讲到联赛发展，MLS当然想少啲老将，多啲当红巨星或者新星来投，就好似效力FC多伦多嘅意大利国脚基奥云高（Sebastian Giovinco）！可以点样做？对于美国人搞运动，可以放心啦！唔好忘记佢哋发明过一只类似12码决胜负嘅方法㗎，讲谂头对佢哋嚟讲唔难，再加上将运动商业化嘅头脑，相信美职发展应该好快可以更上一层，令观赏性更强！

同场加映那些年美式12码，5秒内进攻球员同龙门1对1（洛迪高其实都几钟意呢个方式，好玩呀！）：

P.S. 对于上一篇文章：《德甲护级争櫈仔 汉堡有无关爱座？》误写德国后防贺维迪斯（Benedikt Howedes）曾效力汉堡，洛迪高仅此致歉，并承诺往后会做得更好，继续为大家努力带上更好的文章。

（文章纯属作者意见，不代表香港01立场。）