【有线大裁员】专访陈汉威、林普斯　资深体育记者的无奈与感慨

“有线电视记者陈汉威报道”、“有线电视记者林普斯报道”……这两把伴随香港体育观众上十年的熟悉声音，不会再在有线新闻报道中出现。
周二的有线新闻部大裁员，陈汉威及林普斯这两名于有线是最资深的体育记者，双双被解雇。
经过一日沉淀，陈汉威及林普斯今天接受访问，回忆被解雇那天。最令他们难忘及感动的是，当两人各自见完人事部后，各部门的同事蜂拥而上安慰，差点令硬朗的陈汉威当场哭起来。林普斯表示当日逐个同事收到电话后入房被炒，感觉像看电影《大逃杀》。经过这次大裁员后，林普斯以溃不成军形容有线的情况。

2020年12月1日，有线新闻部“大地震”，遍及各部门，专题环节《新闻刺针》全组被炒，中国组总辞抗议，16名港闻组主管及记者随后辞职，以示不满。这次大裁员中，体育组也不能幸免，组内两名最资深的记者陈汉威及林普斯同日被解雇。

陈汉威当日放假，早上去打篮球，收到同事短讯，新闻部大地震，他拿住篮球回到公司，等待他的是“大信封”。他说：“其实都早有心理准备，不过知道呢个消息嘅时候，都好伤感、痛心，其实系心悒。收完信出嚟，其实我都系笑住面对，好乐观，有晒心理准备，系会咁嘅情况。”

陈汉威听到被解雇的消息，尚能冷静以对，但当他一出房门，见到多名同事蜂拥而上时，就按捺不住心中的激动。他形容：“一出到嚟，见到成班同事十几廿个冲到我身边，我即刻同佢哋讲‘你哋唔好过嚟，我好想喊’，啲眼泪已经好似标紧出嚟咁。我对上一次喊，已经系我7年前结婚𠮶阵。‘你哋再埋黎同我讲啲乜，我肯定喊到收唔到声’，我即刻走咗入化妆间匿埋。”

林普斯当日返早更，埋首处理意甲的新闻报道，他下午出去买外卖，返回公司途中，收到人事部的电话。他说：“返到嚟入房，就一连串解释，仲有个HR（人事部）同事讲‘有冇听过朝早被人炒𠮶班大致系点，你知唔知个流程’，佢开始讲一大堆数字，点样赔偿，出嚟之后同阿威感觉一样。首先一班港闻同事走埋嚟，唉！总之个对比好强烈。啱啱先经历咗一样好冷冰冰嘅嘢，开始见返啲人情嘢。”

陈汉威接着说：“其实超级warm（暖心），好难形容。其实所有嘢都有晒心理准备，但我冇预计到咁warm，令人咁感动。好似结婚个个都走埋嚟恭喜你咁，个个又安慰你，我都唔识点讲，正正系呢度先有呢种人情味。”陈汉威在2004年入职，在有线体育组工作了16年，他与太太也是在有线工作认识。

林普斯在2007年到有线实习，毕业后转为正职，到2014年离开，但他在2018年回到有线新闻体育组，工作至今月1日被解雇。林普斯跟着说：“冇错，（人情味）第度真系冇。炒人嘅传闻由上星期开始传，但据闻部门呀头都唔知，直到𠮶日都唔知，不过心理准备一路都有嘅。我冇阿威咁神预言啦，佢𠮶朝话‘都系我同你架嘞’，我就估我哋组都系炒一个，冇谂过两个senior（高级）一齐走。”

陈汉威说：“你睇到个走势已经系，一嚟话剪片炒公认最快手𠮶个，graphic（图像）炒最做得嘢𠮶个，《新闻刺针》一开始话炒最皇牌𠮶个，最后成组炒起晒，中国组又炒人第二把交椅，摄影影得最好𠮶几个人都炒埋，照计都系我哋两个㗎嘞。”

【被解雇有线员工收拾物品离开】

两人发现被解雇的都是相对资深的同事，喜欢看电影的林普斯说：“𠮶日情况真系好心悒，好似睇紧《大逃杀》电影咁，逐个收电话入去，唔系再经你嘅部门通知你。”陈汉威望住一个个同事被炒，感叹：“你只会觉得‘吓！点解会系佢！佢系最做得嘢𠮶个’，你明唔明呀！但佢明明唔系最高人工𠮶个㖞，点解会系佢呀！你一系炒啲最高人工嘅，一系炒啲做唔到嘢嘅。你要cut budget（减预算）系想间公司维持落去，同埋向好嘅方向，你依家系炒做到嘢嘅人，令到公司再沉向底。我觉得讲唔通。”

【有线中国组当日总辞】

林普斯叹道：“喺得呢度做嘅人，人情味都好浓厚，唔知点解，年资深浅都系咁，入得嚟个个都仆心仆命架㖞。人工又唔高，老实讲，都系公开嘅秘密。我谂𠮶日情况系太坏，无论边个人去都好，边个收到电话都好，见到逐个人行入去，总之都好伤心。任何一个人入去都唔开心，但你更加谂唔明佢嘅准则，系点样定。”他认为“架构重组”4只字十分冷冰冰，亦难以服众。

“呢度啲人系傻㗎！”陈汉威说：“尤其系我身边呢条友（林普斯），佢系减人工返嚟。佢俾人炒完之后，都话要写埋最后一只故仔，呢度啲人就系咁。”林普斯即笑着应：“但最后都系出唔到！”那条意甲的新闻报道，他最后要交给同事处理，未能透过VO（新闻旁述）向观众道别。

【有线港闻组多名采主及记者请辞】

两人被炒后，有线新闻体育组只余下两名全职记者。陈汉威说：“其实剩返落黎嘅同事能力都好高，都系独当一面，但系一两个能力几高都好，冇可能返到以前咁。”林普斯亦认同，他说：“剩返两三个人，实际都唔知可以做到啲咩出嚟。当然我唔知佢之后会唔会再请番人，呢啲唔系我所能预知嘅事，你问未来会唔会好暗淡？我唔知，但我依家心情就好暗淡。”他还形容有线新闻的现况是“溃不成军”。

林普斯及陈汉威都经历过有线新闻及体育组最好的年代，两人也是建立起有线新闻口碑的一分子。陈汉威说：“大家咁辛苦建立咗，打咗个江山返嚟，咁多年嘅声誉、公信力、各样嘅口碑，最紧要系行家嘅口碑，各个台都睇住我哋台做嘢。我哋一直喺领先位置，但依家直情系摧毁到冇咗，咁就好心悒。”

林普斯续说：“学阿威话，有啲野建立唔系咁简单。一路好多年储下储下，觉得你呢间公司嘅新闻值得一睇㖞。摧毁𠮶样嘢唔系剩指人数，系直接摧毁个精神。大家都知，挨咗好几个月no pay leave（无薪假），人本身唔够，放无薪假咪变相更加少人，因为更少人返工。大家仍然尽心尽力去做好自己岗位，原来去到最后都冇挨到呢个难关，而系见到呢度情况更崩坏落去。”今年5月的报道指，有线电视的员工由6月起要每月放两日无薪假，为期半年。

谈到有线新闻的过去、现在及未来，两人各打了一个比喻。林普斯说：“我哋心目中11个人踢先系足球嚟，但你唔系，你话7人都可以踢11人场，都系，场波都可以继续踢。你话再减，5个人咪一人再跑多几步啰，又得㗎。你无限推落去，你咪睇下每个人心目中咩叫足球啰。最后人都冇埋，得番个波喺度，可能你觉得都仲系足球，但我哋心入面觉得唔系呢一回事。”

陈汉威就以外国著名电视节目MasterChef为比喻，他说：“我哋一直追求最卓越嘅食材、最快嘅速度同最靓嘅摆盘，我哋一直追求紧完美。人哋一睇，就会觉得有启发性，但高层唔重视优良传统、对质素嘅追求，慢慢就发展到，原来煮熟咗就得㗎嘞？求其摆啲野上去都OK，生生地都得㗎！你要接受呢样野，日后有线新闻就变咗质。”

陈汉威及林普斯视有线新闻部为大家庭，前者笑言多次说过想离开，但最后留足16年，由当年的“青训小将”成长为被解雇前的“球员兼教练”；后者曾经向外闯，最终也挂念有线的一切而减薪回归。林普斯认为新闻部内各组像兄弟姐妹，“喺我走之前，人手都唔够，半夜有啲波冇人搞，好在外电有啲同事钟意睇波，又想朝早有少少体育嘢，佢就去搞埋，呢啲真系好似兄弟咁。”

然而，这次大裁员后，有的被炒，有的主动请辞，这个大家庭的成员各散东西，林普斯说：“如果你形容呢个系屋企，我觉得呢个家已经散咗。仍然喺度嘅家庭成员，真系唔知同佢哋讲咩好。”

“加油呀？仲好唔好同佢哋讲加油呀？佢哋一直以嚟都已经好加油嘞㖞！冇油㗎嘞，大家冇油都仲好加油，好多时啲野，人人都愿意蚀底咁去做。你仲有乜鼓励可以畀到？冇㗎嘞㖞，就系咁。”

欲更了解陈汉威及林普斯在有线新闻的体育记者生涯喜与悲，请继续留意01体育报道。