雨侨坐月用廿斤姜洗手　惊叹：佢哋系去钓石崇鱼嚟煲汤俾我

今年8月雨侨同罗力威嘅囡囡终于出世，佢地并无请工人同陪月，靠自己同家人一手一脚凑B兼坐月。传统智慧话坐月坐得好，生产前嘅病痛都可以根治，雨侨呢日分享“长洲人夸张坐月大法”，原来佢全靠一个住长洲嘅伯娘帮手坐月：“长洲天字第1号凑仔高手，呢1个月我完全冇掂过生水，伯娘劈咗20斤姜总共冲咗3次凉，自己拍姜冲凉效果真系唔同啲。”

坐月期间唔可以掂生水如果唔系会入风，但一个月唔冲凉唔洗水真系听到都痕，雨侨伯娘帮佢准备好：“呢一个月我完全无掂过生水，伯娘劈咗二十斤姜总共冲咗三次凉，简直扫咗菜档个场，再大樽小樽用嚟洗手洗面。自己拍姜冲凉效果真系唔同啲，不过真系太辛苦屋企人了，后期就改用浸浴包。我亦都无饮过清水，我有自己准备嘅月子廿八方同炒米茶，伯娘都嫌唔够，仲要加埋佢喺特定年份月份买嘅果皮，再喺长洲晒咗唔知几多年，真系听到都觉得复杂。”

另外食疗方面就更加重要，最珍贵唔系贵价补品，而系雨侨亲友出心出力，买唔到就自己去钓﹗“对伤口又好上奶又好首推石崇鱼汤大家都知啦，但系街市好难买到石崇鱼，所以佢哋索性去钓?系呀我都听到黑人问号，不过喺长洲鱼真系最不缺，总之最后佢哋系去钓石崇鱼嚟煲汤俾我，钓剩啲虾仲要炒埋蛋俾我老公食，你幻唔幻想到成班乡亲父老喺道钓鱼搣虾再拎出嚟香港俾我？佢仲争啲叫埋大屿山班friend晒啲防风草俾我，可惜唔啱季节呀... 因为有呢班好crazy嘅长洲人，我坐月嘅日子系可以好好调理，好在无拎两只生鸡上嚟养，唔系真系吓到我吃手手”