【专访】Gin Lee开关后最想回家乡共聚天伦：我真系太耐冇返屋企
Gin Lee（李幸倪）即将在本周五（20/11）推出个人第7张广东歌大碟《Dear Secret》，代表自7月起展开的《失格游人》企划将走入最终部曲。她与填词人商量后，决定新碟内《幸福门》、《美男子与香烟》等歌曲都以家中物品为主题，期盼用歌声勾起听众共鸣：“我觉得每个人都有自己嘅家，比较容易讲一啲大家有共鸣嘅故仔。呢样嘢好重要，之后慢慢发展到依家有唔同嘅部曲，视觉上用MV带出当中的故事。”
《失格游人》最终章《开灯·熄灯》MV将由Gin Lee亲自担任主角，在今次专访中，她谈起拍摄时的准备功夫及过程时表现得相当雀跃。同样喜爱演戏的她，被问到在2018年完成红馆个唱后还有甚么目标时，直言最初有考虑过做演员：“一定会有唔同阶段嘅目标，可能有一日我会想做演员㖞！其实我都有谂过，我钟意做戏，但系我知道演戏同唱歌一样咁难，需要将把刀磨好多好多年，先可以真系做到一个专业嘅演员，就好似磨咗我自己把刀咁多年，先做到一个专业嘅歌手一样。如果你问我有咩想做而未做到，做演员系其中一个。”
撰文：刘传谦
采访：刘传谦、游大东
摄影：叶志明
拍MV勾起演戏兴趣
在筹备《失格游人》时，Gin Lee和团队都想找实力派演员担任主角，包括《幸福门》的陈汉娜（Hanna）、《美男子与香烟》的韦罗莎（Rosa），及串连整个三部曲的胡卓希（Jason）。她坦言当初决定亲自上阵拍新歌MV时倍感压力：“我自己要孭返起第三部曲，其实个压力真系好大，拼埋两个咁专业嘅演员，讲真都真系惊嘅！导演都有问我钟唔钟意演戏，建议我演返，我系想自己演返，因为第三首歌系我自己写，情节都系建基于我嘅真实故事，我想自己参与返。”据了解，这首歌就是为刚刚逝世的爱猫为作，难怪最近Gin Lee会先后上载自己练歌时失控痛哭，及独自坐在一旁流泪的影片。
执导Gin Lee《幸福门》MV 张蚊揭开选角原因：陈汉娜气质够诡秘
虽然享受演戏过程，但毕竟Gin Lee并非专业演员，不少人都认为导演会降低她的演技要求，结果Gin Lee主动提出，要求导演维持标准，一视同仁：“真系多谢佢哋嘅，我有同佢哋讲，一定要Push我，如果佢哋觉得我（演得）唔够好，一定要话畀我知，就算要做好多个Take，都要去到一个大家都觉得好嘅程度，唔好因为我唔系一个全职演员而唔Push我，一定要话畀我知点先可以做到最好。”
为准备这次演出，Gin Lee除了提早到场，透过观察从Hanna和Rosa中偷师，亦会在欣赏美剧的过程中，参考西方演员在剧集中的神绪：“佢哋唔系七情上面，净系用一个眼神，一个小动作，就可以带出佢哋嘅情绪。”虽然故事取材自亲身经历，但剧情亦经由导演修改，Gin Lee在拍摄中与团队紧密沟通，只为做个称职的演员：“例如我有一幕要不停重复开灯、熄灯，中间系会穿插一啲惊栗嘅元素，我会问佢哋，究竟我𠮶时嘅状态系点呢？唔可以就咁不停开关，速度上面应该系会有变化。剧本系佢哋写嘅，佢哋系会最清楚。”
最想搞世界巡唱 趁机环游世界
除了演戏，Gin Lee目前最希望举办一个世界巡回演唱会，既可以兑现初心，继续努力成为一名能影响世界各地听众的歌手外，亦能继续环游世界。然而，在新冠肺炎影响下，出国成为一大难题，若然日后疫情放缓，Gin Lee最希望先回家乡马来西亚：“呢一刻如果开返关，一定要返咗屋企先，因为我真系太耐冇返屋企啦！我好挂住屋企人，佢哋又好挂住我，所以开返关一定要见爸爸妈妈先。之后就一齐去旅行，但系我未谂要去边。其实去边度都好开心，因为太耐冇得出去，去边度都好啦！”
因儿时意外钟情自驾游
Gin Lee本来计划在今年与家人到冰岛自驾游，被问到为何会钟情于自驾游，此时她想起第一次与爸爸、妈妈到新西兰旅行的经历。事前家人没有任何计划，亦没有预订酒店，虽然当时正值复活节旺季，他们却从未想过所有酒店已经爆满，在零度下，一家人只能在车上睡觉，她记得爸爸当时尤其辛苦：“车唔可以长期开住暖气，唔系就会好危险，于是成晚就开住一阵，觉得唔得就熄番。佢话自己冇瞓过，因为要照顾我哋嘅安全。”
虽然有过这段惨痛经历，但她仍十分向往在旅程中这些即兴、随心的画面：“好想再揾返呢种感觉，依家已经唔会够胆唔做资料搜集就去一个地方，唔够胆唔预订酒店，人大个咗就会想稳阵。同埋唔似以前可以随时放假，依家可能一年只能够放一次，唔想再有甩漏，因为呢种心态就会计划好晒所有嘢；但系内心深处又会觉得，其实都几正吖，系有一种好矛盾嘅感觉。其实谂谂下，跟团都几好吖，有时人就系咁矛盾！”
细听《随风而来随风而去》 感受Gin Lee的兴奋
当然，一段令Gin Lee记忆犹新的旅程，总少不了一些美满的画面。她记得当时爸爸负责驾车，一家人在车上一边唱歌，一边享受沿途风景：“我哋一路会开住唔同嘅歌单，一路唱住，听歌，好开心。个景真系好靓，望住啲山、湖、海，配埋啲音乐，真系好享受。”若然读者想感受Gin Lee当时的兴奋，可以细听《随风而来随风而去》，因为她在录音时一直想起这个画面。被问到今次会否自己驾车，她笑言：“最好唔好啦！我相信家姐同姐夫都会去埋嘅，我谂佢哋轮流驾都会安全嘅。”