78岁卢海鹏上节目明显消瘦　爆曾靠积蓄挨过艰困时期

卢海鹏日前接受好友苑琼丹邀请，作客香港开电视节目《开工大吉77》。鹏哥久未露面，笑言“睇住苑仔大”，喜见对方演技有进步：“我对住啲蠢嘅对手会扯火闹人，我理得你喊唔喊，总之做戏唔好怕场面，但系女仔我好少闹嘅，唯有唔出声啰！对住好朋友我就会讲笑嘅，但对住陌生人就唔出声喇，但系我个样点样嬲，大家都系觉得好笑嘅，你话系唔系死火！我有自己主见，啲人可能觉得我固执啰，好唔好相遇就睇环境啦！”

鹏哥就话从小对演戏充满兴趣，街头睇完粤剧，回家即与好友再演一次：“我唔记得台词㗎，钟意咪自己加啲嘢上去，全部自己搞。去到中学就做民工团团长，咁我样样都要识啲，到毕业谂住考电影呢行，点知间间都唔请人，最终出嚟做嘢。二十七岁落到嚟香港，谂住考训练班，点知我超龄！到第二年又去试，又系唔收我，第三年都冇晒心机，偏偏有个朋友话我知，呢年收生收到三十五岁，当时我人工都成八百蚊一个月，但成世人钟意做戏，都系去考多次，最终同周润发、吴孟达呢班人做同学。当时签约得五百蚊一个月，毕业仲要自己整件‘单吊西’，我系靠四千蚊积蓄挨到毕业。”

入行后靠积蓄过活，鹏哥笑言曾要行路返工，更会把握每个演出机会：“当年做特约五蚊一集，我咪举手做啰，因为我个样恶，专揾呢啲角色比我做，做得嚟又辛苦又难记，我咪试吓做喜剧演员，大家觉得几好，咁就转咗型喇。”鹏哥笑指自己“半退休”，坦言有工开会再度复出：“梗系想做啦，但依家都冇嘢做，唯有退休啦！只要体力、能力做得嘅，都想做㗎，只不过唔可以太大动作嘛。我从来冇攞奖梦，后生时就想攞钱，到后期都几廿岁，攞到个奖证明呢行对我都有肯定。我咩角色都做过晒，由细到大都钟意做戏，做到个名出嚟，都可以话系得偿所愿。”

卢海鹏久未露面明显消瘦！

同场加映：盘点圈中20位素食男女个个冻龄　马德钟否认整容多年不变全靠食素