足球小将造就日本足球发展？

如果要揾地球上影响力最大嘅足球漫画，睇怕都非高桥阳一嘅《足球小将》莫属。虽然近年无论系剧情、必杀技同画功方面都严重崩坏，但你唔好理，远至身处地球另一边嘅费兰度托里斯、沙治奥阿古路同“大恩”恩沙基都据闻系睇《足球小将》长大。作为漫画大国，动漫喺日本嘅地位已经超越咗一本书，从中可以睇到日本国内潮流同国民谂法，就算系足球动漫都唔例外。

迷信“Playmaker”？

高桥阳一1980年开始绘画《足球小将》，故事入面无敌主角首推当然系戴志伟同麦泰莱，一个扭十个、中圈远射、超阔视野，再加埋主角“一个救全家”嘅光环，系当时无数小朋友嘅偶像，以致踢波𠮶阵都争住打中场、著10号。“戴志伟”同“麦泰莱”某程度上亦反映当时日本足球界对“Playmaker”嘅向往；而更深层影响，就系令日本足球进入咗盛产“Playmaker”嘅年代：较远嘅有小野伸二、中田英寿、中村俊辅，而近年就有香川真司同本田圭祐、清武弘嗣、干贵士、武滕嘉纪等等。喺𠮶一代日本国民心目中都相信，只要喺一个出色嘅“Playmaker”带领之下，就可以有挑战世界嘅本钱。

尤其当2002年日韩世界杯嘅时候，只系第二次打入决赛周，日本喺小野伸二、中田英寿、稲本润一嘅“黄金中场线”引领之下，已经打入16强，只以一球不敌当届季军土耳其。当时有好多人都认为《足球小将》系令当代日本出现大量优质攻击中场嘅原因之一。

但喺2014年世界杯，日本一场不胜，只攻入两球情况下小组包尾出局。引以自豪嘅中场线完全发挥唔到水准。其实日本足漫对“中场”球员嘅刻划亦都唔再系停喺对“Playmaker”嘅推崇。

《球场幻想曲》入面嘅攻击中场近藤敦以力量同身体对抗性为卖点，更类似现代嘅欧陆式中场，而另一角色森川龙司亦似足现代嘅“坠后组织中场”（Deeplying Playmaker）；而笔者高度推荐嘅另一部漫画《逆转监督》（可惜香港已经停刊……），主角桩大介虽然缺乏自信，但有飞快速度同惊人体力，虽然系踢防守中场，但随着剧情发展经常愈攻愈前，来回敌我禁区之间，正正系现今足球阵式最重要位置，亦系日本队缺乏嘅“Box to Box中场”。

或多或少，其实都已经反映日本国内开始明白到足球大势已经改变，以往“10号仔”一个救全家嘅时代已经有所改变。

“小志强”迷思？

讲到《足球小将》嘅第三主角，唔使谂都会即刻叫出“小志强”嘅名，一个就算唔计佢可以射只老虎出嚟，净系可以同外国人比拼力量不落下风呢点，都知只会喺漫画入面出现嘅角色。往年日漫之中总系会见到一个“屈高”、冲撞力强嘅中锋：《足球小将》小志强、《踢出我天地》叶恭介、《球场幻想曲》五代晃、陆奥武彦、《我们的足球场》寺本德二（虽然最后转咗打后卫……），总之一定要有一个大只佬做开路先锋。日本人除咗对“Playmaker”有一种执著，同样对大只入球率高嘅中锋有一种渴求。

但经过近几年同强队比拼落于下风嘅真实情况，唔难发现现实中日本都缺少一名高效前锋，远古时期嘅中山雅史只能喺日本国内“揾食”；三浦知良外流期间难以算得上系成功；02年世界杯嘅3大前锋：铃木隆行、叫做“高大威猛”嘅高原直泰、柳泽敦同前辈相比更加不堪；之后嘅卷诚一郎、玉田圭司更加系讲起都唔会有印象；直到近年先有冈崎慎司出现，但除咗勤奋之外，入球率不算出众，今年已经喺球会失去正选位置；柿谷曜一郎同大迫勇也表现似乎亦未如预期，对国家队嚟讲同样系一大危机。

可能系认清现实，又或者日本漫画家都要突破，近年日漫之中嘅前锋都开始有所转变。令笔者最深印象系而家日本大热，由伊贺大晃同月山可也一齐创作嘅《足球骑士》，主角逢泽驱除咗走“草食系”路线，亦都无健壮身形，靠嘅系门前嘅“嗅觉”同出色走位；《球场幻想曲》主角坂本辙平亦都系以辅锋出现，最后同冲田薰以双辅锋阵式上场；香川真司都推荐嘅《BE BLUES!〜青になれ》（可惜无出中文版……）主角一条龙经历重伤复出，同样无身型优势，除左近以前锋挂帅之外，其实更加系类似现代嘅内切翼锋。

不如谂下用中坚做主角啦！

老老实实，要同世界列强一争长短，防守比进攻更重要。睇吓2014年世界杯，就算日本有一球在手，但系只要科特迪瓦“爆seed”（正确黎讲系杜奥巴“爆seed”），已经彻底击溃日本队防线。

与其谂点样进攻，不如从根本着手。画一部用中坚做主角嘅漫画，睇下有冇可能吸引到更多小朋友向中坚位置发展咪仲好！

（本文纯属作者意见，不代表香港01立场。）