COFFEE林芊妤Youtube订阅破百万 坚持广东话拍片：我系香港人
Coffee林芊妤自从离开TVB后，以瑜伽导师专业形象建立口碑，勤于拍片分享修身心得，成为唔少人追捧偶像。呢日Coffee有喜讯宣布，佢嘅YouTube频道开咗不足1800日，未到5年就突破100万订阅，香港艺人中就只有佢同G.E.M.邓紫棋达到百万指标﹗Coffee接受《香港01》访问时就表示：“有段时间去咗生仔，应该要早啲100万﹗”
《香港电影我撑场民选大奖2020》全民一人一票，用行动撑本土！
旗舰智能手表 Series 5、Dyson风筒等丰富奖品等你赢！
抽样睇返香港艺人嘅个人YouTube频道，G.E.M. 2018年11月突破100万订阅，至今有224万订阅，其余艺人好似Eason陈奕迅系17万1千，张敬轩13万3千，youtuber转战港姐入行嘅蔡嘉欣都系只得13万8千订阅。Coffee嘅频道开咗不足5年可以破百万真系相当利害﹗佢接受访问时话：“应该要早啲100万，本身我上升速度好快，但因为有段时间去咗生仔，由一星期一条片变到一个月两三条片，同埋拍多咗关于大肚怀孕嘅片段，比较小众无咁多人睇。自己唔太著重数字游戏，自己嘅目标都唔止100万，最开心系有一班支持关心自己嘅朋友，系一个好大鼓励但唔会自满，平常心面对。”
部分香港艺人Youtube频道订阅人数：
Youtube系全世界睇影片嘅主流平台，用英文拍摄当然较多人有兴趣，但Coffee嘅片一直坚持用广东话拍摄，而且只加上少量中文字幕：“好多人叫唔好用广东话拍片，市场会比较细，劝我用普通话或英文拍更多人睇，我都系决定用广东话拍因为我系香港人，都系想用返母语广东话﹗好多香港以外朋友睇我嘅片，因为咁而去学广东话我系好开心嘅。”
睇返Coffee系离开TVB后，15年6月先开设个人YOUTUBE频道，有网友留言感激TVB当年放生令大家见到更好嘅佢，Coffee都深表认同：“其实真系架，如果唔系佢地决定停约，我只会继续浮浮沉沉，唔会舍得离开。因为我性格会觉得唔知可以去边唔知可以做乜。因为TVB嘅决定令我成个人性格改变，以前只会人哋推一推我先行一步，离开后要谂自己行嘅路，建立自己嘅路向人际网络，会好清楚大胆表达自己思想。”