【飞槟吧！男神】黎学勤莫竣名大马开酒吧奉旨沟女：啲女仔好热情

两大广告界男神莫竣名﹙Louis﹚同黎学勤（Jeffery），前年为ViuTV主持《一路向西伯利亚》，节目虽然系以旅行为名，但观众都一致认为沟女为实。莫竣名同黎学勤今年再次合体，名为《飞槟吧！男神》嘅节目，话就话系要经营旅馆兼酒吧餐厅，但每集嘉宾唔系网红就系选美小姐，做苦力都开心过人。不过，上得山多终遇虎，提到导演精心设下嘅“伏位”时，莫竣名都忍唔住爆粗话恐怖过《入住请敲门》……

韩国实境真人骚《尹食堂》由4位艺人去到外国合力打造小店，并向当地人推广韩国美食，收视屡创新高。内地随即出了一个《中餐厅》，仲唔经唔觉拍到第三季。ViuTV嘅《飞槟吧！男神》，同样系由艺人去经营酒吧旅馆，但一问到赚定蚀嘅时候，黎学勤一个苦笑已交代了所有，再来系莫竣名话拍摄时忍唔不停开酒饮……“导演都有俾压力，每日都报告赚蚀几多，但我哋最终都无问蚀几多，但应该系大出血，因为我哋差不多拍二十日，但得两日系赚钱。”反正酒吧又不是自己生意，赚或蚀当然没有压力，有女沟才是最重要吧？！“我哋有做任务赚外快，试过早上5点出海捕鱼，book埋船有师傅跟，点知出海两个钟头后，船夫先话想要合法捕鱼要再坐多几个钟，结果只系捉到4条鱼，埋岸之后去鱼市场买。”

员工先系真正CEO

莫竣名表示由于酒吧并非位于市中心，人流是其中一个问题，另外酒吧员工嘅态度亦令二人非常头痛，黎学勤说：“香港一般都系中午就去准备，但佢哋临开铺先现身，变咗好多嘢都要我同Louis做，有时同佢哋讲嘢，明明系露齿笑，但原来系唔明我哋讲咩，当我哋傻仔咁。”员工唔听话，身为老板嘅两位连房都要自己执埋，可有意外惊喜？“有啲正方形包装嘅嘢，用完就咁丢地下……”黎学勤说时都频频直呼核突，莫竣名则在一旁偷笑话：“导演见到咁开心，都一定叫我哋去执啦。”

大马女嘉宾易沟啲

俗语都有话“有咁耐风流有咁耐折坠”，听完折坠，系时候分享风流史。对于今次嘅女嘉宾，两位名草有主嘅男士都好含蓄咁表示：“比起《西伯利亚》，今次沟通系方便好多，西伯利亚景好靓，但同女宾互动唔多，或者系因为佢哋比较内敛，但马来西亚比较热情，会好照顾我哋，不时问我哋惯唔惯。”口花花撩女仔、搽太阳油等举动会否被事后清算呢？黎学勤笑住咁话：“都惊架，但有即时报案。”至于莫竣名，拍摄期间其女友曾飞往当地探班兼庆祝生日，整个人即时变得非常内敛。黎学勤说：“佢拍《西伯利亚》时好主动，一有靓女就话‘我嚟’，今次系一拍完cut机即走埋女朋友身边,，搽太阳油就叫我去。”莫竣名声称唔系怕，而系担心会中伏，所以才将重要任何交由黎学勤执行。

姐姐入房坐大脾……

虽然系生意失败，但导演同制片见大家做咁辛苦，所以最后都安排咗一场又一场嘅庆功，但恶梦因而降临喺二位男神身上。受害者黎学勤忆述：“叫完酒之后，突然有班姐姐入嚟，一入嚟就坐喺我大脾，我完全俾唔到反应 。”另一受害者莫竣名：“你嚟饮酒可以，但唔好摸手摸脚嘛，制片话我怕羞，所以叫咗其一个姐姐cheer up我，你知唔知佢行为系点？我当时著短裤，佢伸咗只手入我条裤（从裤脚），真系what the fxxk。”莫竣名强调只系大腿失守，重要部位未有被姐姐触及。“最后点收科?系咁叫饮杯啰，因为佢只手要拎杯摸唔到我。”到底呢个环节系伏定系真心慰劳宴？二人都表示无从深究，莫竣名更笑言应该系之前拍节目前玩得太幕后，导致今次遭报仇。

场地提供：Comma Party

黎学勤服装提供：D-mop