李亚男囡囡随时出世　与王祖蓝影孕照齐晒白滑巨肚

李亚男（Leanne）同王祖蓝嘅宝贝女12月底预产期，之前Leanne已经讲过为咗爸爸可以陪入产房睇住囡囡出世，决定择日剖腹生产。大肚嘅日子进入最后倒数阶段，呢日佢地就分享早前拍摄嘅孕照，网友大赞好温馨好有祖蓝STYLE呀。

近年好多人都会影大肚相，通常比较唯美性感甚至全裸，不过Leanne同祖蓝就选择最为简单嘅黑白情侣衫配长裤，毕竟幸福本是简单而平淡，最普通嘅造型更能突显佢地几咁恩爱。两个人深情对望，亲亲老婆孕肚，仲有祖蓝指住个肚好似要同囡囡训话咁款。

最搞笑嘅一张相系Leanne同祖蓝各自用对方大肚遮住半边面，同Leanne合照嘅当然系祖蓝个肚腩啦，两公婆个肚一样大，亚男喺微博都要讲一句：“爸爸的肚子好神奇。”而祖蓝就喺IG话：“我都就生，bigbigchannel个friend bigbigtummy ，期待﹗”