董敏莉宣布“最强小三”正式面世　与爱女同月同日同磅数劲有缘

董敏莉（Monie）今年7月宣布怀孕时，更笑言囡囡系佢同老公之间嘅第三者，日前呢位“最强小三”终于出世啦﹗

女儿系爸爸嘅前世情人，董敏莉（Monie）今年7月宣布怀孕时，更笑言囡囡系佢同老公之间嘅第三者，日前呢位“最强小三”终于出世啦﹗妈妈无呷醋之余，仲话同囡囡相当有缘份：“我专登拣同自己生日开刀，以后方便一齐庆祝，点知囡囡同我同月同日同磅数出世，真系缘分！”

Monie同好友吴日言、林芊妤差不多时间怀孕，孕期中亦面对唔同难关，阿YAN患上妊娠糖尿，Coffee胎盘前置，而Monie亦因为有子宫肌瘤，令生产过程面对好大风险：“因肌瘤颇大阻碍产道，增加手术风险，医生都讲明有危险性，惊失血过多，有二千分之一机会要切除子宫，最终医生尽力帮我止血，大小平安。”

虽然面对好多风险，但见到囡囡出世一刻，Monie同老公都相当感动，觉得一切都值得：“老公有入产房陪产，我专登拣同自己生日开刀，以后方便一齐庆祝，点知囡囡同我同月同日同磅数出世，真系缘分！我哋一早已经帮囡囡改好名，中文名叫子子，英文叫Martha。成个过程都好顺利，初时都会喂人奶，希望畀到最好嘅营养BB。”

产后Monie会停工两个月，但手上已经好多广告揾上门：“电台主持𠮶度我就请咗两个月假，到我身体回复之后就会返去开咪。其实大肚期间都有好多妈咪级嘅广告揾我，睇来我都已经开拓咗一个新嘅市场。（会唔会考虑母女档上阵？ ）咁长远梗系未谂啦，如果阿女好似我咁靓，爸爸又准许的话，都唔介意佢入行嘅。”