【01博客咁睇波】东欧新丁看点：有睡裤门神，又有兄弟相残
阿尔巴尼亚外围赛作客一球都冇失过，但守强攻弱，攻力一样不济。世界排名 24 队最低，仲要对住主办国法国——不过阿尔巴尼亚之前友赛法国一胜一和。另外两队罗马尼亚同瑞士并非传统强队，捞返个第三爆冷都冇话完全唔可能。李斯特城都捧英超啦。阿尔巴尼亚拎冠军“不过”系 300 倍之嘛。
话咁快就欧洲国家杯（下称“欧国杯”）开幕，列强大国讲得太多，电视台有《欧游全细界》，我都同大家讲下小国。
上届（2012）欧国杯决赛周都只系 16 队，今届就扩张到 24 队。咩概念？即系 53 队争 24 个位，差不多一半机会，同时亦造就好多小国有机会踢决赛周。
决赛周有 5 队波处子登场：威尔斯、北爱尔兰、冰岛、阿尔巴尼亚同斯洛伐克。但我唔打算讲威尔斯同北爱尔兰，反正不少球员在英超或英冠揾食，香港又多恋殖球迷，应该几熟悉。况且两队其实都踢过世界杯决赛周（北爱就细个睇过，威尔斯就我阿妈都未出世）。冰岛就真小国，亦都未踢过任何大赛决赛周，但都系唔写。原因？主要因为我冇去过。
对，睇作者介绍都知我热爱东欧，你见篇博评最顶𠮶张相，就系喺斯洛伐克影的。就写去过嘅东欧新丁——阿尔巴尼亚同斯洛伐克，顺手写埋同样去过又钟意嘅匈牙利。点解？匈牙利足球积弱多年，对上一次踢欧国杯决赛周时，我都未出世，以新一代“历史由我开始”的原则，都可以当新丁。
入正题，每队我会讲下：
1）国家印象2）大赛经验3）代表作4）球星5）简评
阿尔巴尼亚
国家印象：国旗上面好大只鹰，中共的老朋友，同其他语系完全无关的阿尔巴尼亚语，自梳女，碉堡，德兰修女。
大赛经验：冇
代表作：外围赛作客砌低葡萄牙，主场就守到 92 分钟先输。同组友赛作客和法国，主场赢埋。
球星：当然系效力瑞士球会巴素利（Basel）嘅沙加（Taulant Xhaka）。有乜特别？佢同父同母嘅细佬 Granit Xhaka（下季转去阿仙奴）唔系代表阿尔巴尼亚，系代表瑞士。而瑞士仲要同阿尔巴尼亚一组，即系应该可以兄弟同场对决。继 2010 世界杯保定（Boateng）兄弟分别代表德国同加纳对决后，又一佳话。
仲认到第个嘅，可以留意踢法甲南特嘅队长 Cana，亦系国家队上阵次数最多球员。另外，正选门将 Berisha 踢紧意甲拉素。
简评：阿尔巴尼亚外围赛作客一球都冇失过，但守强攻弱，攻力一样不济。世界排名 24 队最低，仲要对住主办国法国——不过阿尔巴尼亚之前友赛法国一胜一和。另外两队罗马尼亚同瑞士并非传统强队，捞返个第三爆冷都冇话完全唔可能。李斯特城都捧英超啦。阿尔巴尼亚拎冠军“不过”系 300 倍之嘛。
【欧国杯最新动态、分析及球评，尽在 01博客 x 01Sports 欧国杯专页！（按此进入）】
斯洛伐克
国家印象：木教堂，靓女多（是真的），捷克个旧相好，现已离婚。留意斯洛伐克（Slovakia）唔系斯洛文尼亚（Slovenia）。原文 Slovensko 同 Slovene 更加难分。
大赛经验：斯洛伐克 1994 年先“再出现”。 2010 年世界杯打入十六强，分组赛踢左意大利出局。
代表作：巴闭咯，外围赛主场赢西班牙，系西班牙 8 年嚟首次外围赛输波。仲有早两个星期友赛，作客反胜德国。欧洲两大强队都输过俾佢，劲呀。
球星：都系𠮶两个。队长系英超利物浦的史基泰尔（Škrtel），副队长兼首席球星当然系意甲拿坡里的队长咸锡（Hamšík），佢亦系分组赛该组神射手。
简评：5 队首次亮相嘅球队，斯洛伐克世界排名最高。24 队当中佢排 14，又有遇强愈强嘅往绩。对残阵嘅俄罗斯唔成问题，分分钟可以砌低埋英格兰。捞个次名出线唔系发梦。
匈牙利
国家印象： 匈牙利牛肉饭（Goulash，其实系汤）， 卷毛猪， 布达佩斯（Budapest）链子桥，多瑙河，作曲家李斯特（Liszt）， 水球，剑击，浸温泉，大鳄索罗斯（Soros），电脑之父冯纽曼（von Neumann）。
大赛经验：大把，拎过世界杯第二添。但 86 年后绝迹所有大赛决赛周。
代表作：不幸地，系冇嘅。
球星：冇得讲，一定系门将基拿利（Király）。最易认当然系佢条晨运裤／睡裤。咁多年都系咁嘅造型。对，我读大学时已睇紧佢踢波！当时代表哈化柏林（Hertha Berlin）踢欧联添，最记得都系条裤。
当时睇佢系 1999 年，如今佢老人家已经过咗 40 岁生日。若果佢上阵，会破纪录，成为欧国杯决赛周年纪最大嘅球员。而佢呢几年都仲系正选，早已经系代表匈牙利次数最多嘅球员。老人家仲得唔得？6 月头匈牙利作客友赛德国，见佢身手都仲几好。
简评：讲匈牙利足球，你必定听到讲波佬讲普斯卡斯（Puskás）。普斯卡斯当然系神级，但，1927 年出世呀大佬。对，所有匈牙利足球嘅光辉，都系阿爷𠮶代嘅事。
另一“阿爷年代强国”乌拉圭足球都复兴，匈牙利都总算碌到入大赛决赛周，但明显地，系受惠于决赛周 16 队变 24 队。外围赛同组只系北爱尔兰罗马尼亚，都只拎到第三再附加赛晋级。有几多实力，大家心照。
今次分组对住专杀弱旅的葡萄牙，C 朗拿度（Cristiano Ronaldo）拎神射手，就系靠对匈牙利呢场。另外仲有奥匈帝国年代的旧相好奥地利，而奥利地在外围赛 9 胜 1 和。
仲有系首次亮相嘅冰岛都不太好惹。3 场货仔，有得睇好睇，求神拜佛望基拿利唔好伤，破完纪录可以执嘢走。
【九位球迷博客讲波经就叻，估波又如何？不如睇睇佢哋嘅心水队伍同预测！】
（本文纯属作者意见，不代表香港01立场。）