【树仁心声】愿意留在宝马山食饭的学生 个个都是勇者！
树仁大学贵为大学，不过一直都冇一间似样的饭堂，虽然附近有几间食肆，不过大部份同学宁愿搭车落铜锣湾、北角、炮台山，都唔愿意留喺宝马山，到底呢几间食肆点解令人闻风丧胆，而愿意留喺宝马山食饭的同学，又点解偏向虎山行呢？
大学生活除咗上堂、上庄，医肚都系一大课题，唔同大学都有自己的招牌菜，好食又好，唔好食都好，都叫自己特色，不过对于树仁的同学仔来讲，呢一切都只系笑话，因为我哋系名副其实冇啖好食。至于点解我会话树仁的同学，系一位位的勇者，你睇落去就知。
【前菜：新云景肚屙烧味饭】
喺宝马山生活的树仁同学，一定听过附近两间餐厅的大名，一间叫新云景，一间叫隽园，两间并列树仁学生的揾食禁地，同学仔对新云景睇法非常两极，唔存在所谓的中间派，爱的人就会日日食，不爱的人打死都唔食，价钱上新云景比较抵食，食物质素好唔好就见仁见智，不时会收到同学的肚屙报告，冻饮系高危选项，不过因为全天候有烧味饭食，加上选择多，吸引不少同学以身犯险。
相关文章：大学难识真心朋友 由期待变失望 最后接受现实的心路历程
【主菜：隽园异次元菜式】
为人不识隽园菜，纵称英雄也枉然。隽园以“新奇”菜式著名，每日有为数不少的同学以身试法。不过好多都系为势所逼，如果只有个几钟空堂，落得山来都已经要上山，有冒险精神的同学，就会舍新云景而取隽园。
树仁一直流传一个传说，隽园曾出现过巅峰之作“麦乐鸡肉酱饭”，欧美X中港的超级组合，小编可以话你知系真有其事，当年食过麦乐鸡肉酱饭的人，已经冇再踏入过宝马山，更唔好话隽园。回想当日他更说“果阵差啲死”。
当年小编年少无知踏入隽园，亦亲眼见证一道唔存在于Menu的菜式，仲食左几啖，先畀大家睇睇相，估下佢系乜。
开估，呢道菜式名叫“酥炸牛腩”，我望住佢金黄色的外衣，同入面黑中带红的肉，咬落去就好似咬中一块石头，淡而无味。直觉话我知，呢一个碟唔存在起MENU的神秘菜式，唔系想像中咁简单，有同学估可能系午餐，牛腩饭的卖剩料，真相系点就冇人知了。
【宵夜：冇人送外卖】
有时做要留校做嘢，8、9点左右想叫外卖，唔好意思，你只可以食炸鸡或者pizza，位于宝马山之巅的树仁，虽然称唔上人迹罕至，但出入树仁只得一条慧翠道，实在甚为隔涉，一个如非必要，连的士都唔会上的地方，又点会有外卖呢，喺学校想食宵夜？谂吓好喇。
【树仁学生＝勇者】
有人话，肯陪你挨M记的女仔就娶得过，咁一个愿意留喺宝马山食饭的树仁同学，佢直头系一个勇者，大学毕业下山之后，面对未来的种种难关，都可以一笑置之。“我喺宝马山食咗四年饭”呢个会系一个跟足你一世的成就。