拍得“深度旅游”节目　岂能用“放牧式”拍法？

放牧，即系牧民带住啲牛羊，去某个地方，由得佢自己食草饮水，可以话系最悠闲嘅畜牧方法。放牧者嘅责任，就只需要揾到一个有草有水又无危险嘅地方，其余嘅嘢，就交畀牛仔羊仔佢哋自己搞掂。到时间差唔多，就赶返啲牛羊入栏，收工！无错，你睇紧嘅系方以文讲电视；以上嘅放牧情况，可以喺电视度见到。不过唔系动物频道㖞，而系旅游节目。

深度旅游主持分享　为节目增值

旅游节目对依家嘅观众嚟讲，唔系有靓景靓人就得，尤其喺呢个“旅行我都成日去啦”嘅时代，去大路景点的话，好多观众都唔会收货。要介绍一啲少人去嘅景点，幕后人员同主持就要做足功课嘞。我就钟意睇啲“深度旅游主持”担大旗嘅旅游节目，除咗景点，仲可以听吓佢哋嘅分享，呢啲就系佢哋为节目增值嘅地方。

讲真，上网乜旅游资料都有，如果无咗呢班主持，驶鬼坐喺电视前面睇你咩。

“深度旅游主持”分为几类：

　第一类就真系对个地方好熟悉嘅人，好似杜如风去日本咁，去第二度都死（详情可以睇返佢去首尔）；

　第二类系做足功课嘅，好似系星期六 J2 播紧嘅《50日背游中美》个主持梁彦宗咁（佢系当年澳大利亚绝世笋工比赛最后三强），用自己熟悉嘅 backpacker 套路去做节目。

以上两类主持，都系自己做埋资料搜集、写埋稿，呢啲节目通常都有返啲水准；

　第三类就好似洪永城、黄翠如咁，识得将 writer 嘅资料消化，再将自己嘅经历或者睇法，融为一体去讲畀观众听。呢个方法要靠个人修为，如果对世界无感觉嘅就做唔到。

空壳主持　无经历无意见　无料无Feel

好喇，讲咁耐，数嚟数去都系得 4 个人名。但自从余小姐入主大台综艺科之后，就十个有九个旅游节目都会用“深度旅游主持带你玩尽食尽当地”嘅包装方法。啲主持行行吓、食食吓，都要 sharp cut 去佢哋企定或者坐定咁，望住个镜头讲嘢。有料或者有feel 就话咋㖞，如果系空壳主持，叫佢对住镜头讲自己嘢，咪即系陷佢于不义？唔系每个人都有意见同经历，而又愿意同值得用珍贵嘅 airtime 同观众分享㗎嘛。尤其系啲无做开主持、年纪又细嘅艺人，真系唔好用呢个方法去玩佢哋喇。

ViuTV“放牧式”拍旅游节目　无故事无景点

你睇吓ViuTV星期三、四晚播紧嘅旅游节目《欧游全细界》就领嘢喇。

条桥系好嘅，睇吓啲欧洲小国，大部分观众未去过、靓又景，普通咁拍其实都稳阵嘅。点知又系用“深度主持游”嘅方法去拍，但系两个主持咩都讲唔出，又无火花，真系灾难呀。个节目嘅情况，就好似放牧咁，拣咗个靓地方，由得主持自己嚟，大部分时间都无故事、无景点，斋行……喂，咁都够胆死嘅？

其实新台嘅旅游节目暂时都有呢个通病。重点嘅“半旅游”节目《跟住矛盾去旅行》都系用“放牧式”方法去拍。啲人系充满矛盾呀，但唔系放佢哋喺一个地方就会有事发生㖞。何韵诗同高皓正就得，因为两个都系口水佬。如果遇上啲“非自爆式”嘅主持，咁就死得啦。好似叶蕴仪同连诗雅𠮶两集，叫佢哋去佛罗伦斯做乜啫，完全唔关个地点事。去到圣母百花大教堂出面居然叫佢哋画画？我连百花大教堂都见唔到咁济呀，直接放佢哋喺香港离岛困兽斗已经做到呢个效果啦，飞到欧洲咁远做乜？

一句到尾，玩桥要玩得好。如果无信心嘅话，正正经经、四平八稳去拍返个纯资料报告式嘅旅游节目，拣个无乜人去过嘅地方，有靓人靓景，我估大部分观众都会收货嘅。我？上网揾啲旅游 blogger 睇吓可能无咁嬲。

（本文纯属作者意见，不代表香港01立场。）