名创优品又涉侵权 本地漫画界嬲嬲猪
抄开有条瘾，继月头涉嫌未经授权，抄袭本地插画师 Darylhochi 设计嘅卡通熊仔“白白”卖电话壳卖断市之后，中国知名“日本品牌”名创优品，又被指再次卷入另一单侵权疑云。
本地漫画家江记（江康泉）星期二喺 Facebook 上载咗一张相，指得到友人通知，名创优品推出一款与卡通企鹅“Duang Duang”crossover 嘅缩骨遮，“Duang Duang”中文名系一个谜，不过望真啲佢个样，明眼人都会觉得同江记笔下嘅企鹅“丁丁”相似度高达 99.99%！唔通名创优品卖家品只系副业，实际上系专门帮卡通人物寻找失散兄弟嘅慈善机构？连续两次侵权疑云，惹来本地漫画界不满，呼吁杯葛，研究采取法律行动，其他插画师都忍唔住出图揶揄。
喂喂喂，但系点先算侵犯版权先？根据现行嘅版权条例，版权系一项自动赋予创作人嘅权利，完成创作之后，有关作品就立即得到版权条例保护。但系创意日日新鲜，好难订立一刀切嘅标准，有冇侵权，通常都系交畀法庭决定。不过，之前名创优品香港区总经理黄树丰接受《信报财经月刊》访问时，就对抄袭表达自己一套定义：
除非一个 LV，一个 LA，颜色都是啡色、也是方形、也是手袋，那就是模仿。
嗱！虽然一个“丁丁”，一个“Duang Duang”，颜色都系黑白，“丁丁”都有出缩骨遮，但系……但系……设计有分别架！侵权？唔好问我啦，问返黄总……
名创优品自上年登陆香港，已经惹起热议。明明 2013 年喺内地注册开店，到 2014 年越洋去日本注册商标，摇身一变成为“100% 日本品质”品牌。以 AEON 十二蚊店嘅价钱，卖 UNIQLO、无印良品嘅风格，一年半之间，全港已经开咗 35 间分店。背靠祖国嘅香港人，可能早已对山寨货品见怪不怪，但大型“日本”品牌涉嫌如此明目张胆抄袭，堪称世界奇观。
延伸行动： 冒牌产品唔使花心血搞设计，左抄右抄就卖得，通常都比原作平一大截，对我呢啲想过中产生活嘅草根穷人，确系有莫大吸引力。不过，一边帮衬冒牌货，一边唏嘘本地创意已死，公平咩？香港人，争气啲！要本土！不要山寨！