以今日嘅标准嚟讲　边个唔系“废青”？

“废青”呢个词语，其实真系唔知点样嚟。我试过 Google，“废青”应该由 2010 年开始有人讲。去到 2014 年左右就大行其道，用嚟广泛地形容而家香港嘅一班后生仔。

特征一箩箩　逢“青”都系“废”

根据《香港网络大典》嘅定义，“废青”系指颓废、不务正业、一事无成嘅年轻人。之前有位网上插画家 MR LLH 就画咗张图，列出左“废青十大特质”：

一．穷二．谂起第二日要返工返学就想死三．只想去旅行（80% 想去泡菜国）四．手机不离手，Whatsapp秒回五．经常 hea 父母“得啦得啦”六．淘宝多过行街七．煲剧（TVB 胶剧都话好睇）八．成日呻眼瞓九．间房乱到爆（同啲衫一齐瞓）十．放假冇嘢做都要 hea 到凌晨两三点先瞓

如果按邵家臻喺《时代废青》一书嘅定义，“废青”原本指人人得而诛之、自甘堕落嘅失败者，后来俾高登仔借用成自嘲嘅词语，甚至攻击他人嘅用词。后来更引伸出“废中”、“废老”等词汇，没有谁比更高尚，总之大家都系废。

当然，“废青”通常都系贬低同指摘香港班后生仔居多。

如果要讲“废青”，每个时代嘅青年，喺上一代眼中都会有啲废，先会有“一代不如一代”呢个讲法。每个年代嘅上一辈，总系会觉得下一辈懒啲、冇咁醒目、冇料、冇耐性、话极唔听、成日搞事、冇主见（下删五千字）……所以逢“青”都系“废”，逢“废”都系“青”。

其实根据当下对“废青”嘅定义，全世界由古到今，应该都有上百亿人躺着也中枪。

以下 3 位　系废青嘅极品

睇书睇报纸𠮶时呢，我见到 3 个“废青”人办，可以同大家分享下，佢地按今日“废青”嘅标准嚟讲，应该系“废青”之中嘅 XO。

事例一：头半世人都跟住屋企漂泊，揾到落脚点之后，不务正业，专心耕田，其他老板想揾佢返工都唔肯，结果有个傻老板喺佢 27 岁嘅时候拜访佢 3 次，先肯返工。

事例二：10 岁玩音乐，细个唔系好读书。18 岁就 quit U，又吸毒又周围玩，大个搞生意发达之后衰左舖，就俾人踢出局。

事例三：细个好聪明，但成日搞事，群埋啲官二代，又拜入去高官啲屋企入面，做官唔识睇人眉头眼额，又得罪啲高官，搞到仕途唔多顺畅。

以今日“废青”嘅标准嚟讲，事例一嘅人会畀人觉得不思进取、大牌、好食懒飞；事例二就会觉得佢有不良嗜好、不务正业、唔努力读书；事例三系典型嘅搞事分子，唔识捞、懒醒。

其实，上面三个人分别系诸葛亮、Steve Jobs 同曹操。

每个时代嘅后生仔，都会畀人觉得好唔掂，但呢种唔掂嘅感觉，又有几多系亲身体验返嚟？又有几多系直觉或者道听途说呢？“废青”呢个词汇嘅出现同追捧，其实系因为上一代人懒，钟意一竹篙打一船人所致。唔通我地呢代人，又会话唔识用 smartphone、冇 Facebook嘅上一代，系“废中”、“废老”？

“废青”呢个词语背后，其实反映有人唔识将心比己，只系用一己偏见评论他人所致。呢种世代矛盾几时完？冇人知，除非全社会都学识少啲标签，多啲将心比己啦。

（本文纯属作者意见，不代表香港01立场。）