黄子华重提当年感激刘青云“埋单”青云：大家请下大家 冇乜所谓

相信大家有睇黄子华栋笃笑都有留意到每一晚子华都会多谢某人嘅说话，就系前日（7月22日）子华台上多谢嘅人系刘青云，多谢原因系早期举办栋笃笑时候并唔系一个赚好多钱工作，当时一行廿多人去高级日本料理庆功，包括青云都有去，当时子华只系认识当中3、4人而已，廿多人食日本料理当然不便宜，不过作为主人家的子华也无奈要“万岁”。

而当佢准备埋单时候，收银员称：“阿边个帮你俾咗喇！”原来青云已经帮子华俾咗钱，仲讲咗一句，“我知道呢度好多人同你唔熟，我帮你搞掂喇！”青云除咗系一个“好老公”，更加系一个重情重义嘅人，所以子华都好感恩识到青云呢一个好朋友。

今日亦有机会问到青云知唔知道子华台上多谢佢，青云表示知道呢一件事情，更向身旁张家辉讲咗一句，“听到未呀，多谢呀！讲啦，多谢呀！”家辉呢一刻只能够用惊讶嚟形容，“我同佢（刘青云）食饭，佢好少埋单㗎，多数我埋单㗎。”

青云讲番其实同子华相隔一段时间就会相约大家出嚟食饭㗎，“大家都会请下大食饭，冇乜所谓嘅。”问到会唔会再有机会可以一齐合作，发挥搞笑本色？“其实之前都同佢合作过，不过要睇老板，佢宜家拍一部喜剧都几千万，好劲㗎，我呢啲都系痴住家辉哥叫佢带挈一下我啦。”