【领养格力犬】犬只训练员FB提醒要三思：格力犬有别于一般宠物犬

犬只行为训练员透过专页Bambiland - Photography and Dog Training发布了一篇“长文”提醒有意领养格力犬的有心人，格力犬与一般宠物犬不同，需要更多耐性和时间磨合。

犬只行为训练员小明接受《香港01》访问时表示，格力犬体力维持时间较其他狗狗短，所以与“一次过玩几个钟相比”，格力犬更需要的是“次数多，时间短”，而且他指朋友到澳门见过格力犬后认为牠们对人的反应很极端，“一系好兴奋，一系好惊人”，亦担心领养者一时冲动“无谂过拎咗返嚟搞唔搞得掂”，呼吁大家要想清楚，能够有足够的时间和耐性，给予一生的承诺。

文中提到格力犬有不少“异于常狗”的特性，而且澳门的格力犬曾为比赛犬，没有与人甚至其他狗相处过，严重缺乏社交，更需要耐性和时间磨合，加上格力犬品种独特，颈圈和胸带之类的物品与一般狗狗不一样，有特制的需要，以胸带为例，只有意大利名牌 Haqihana 有格力犬胸带，价钱也相当昂贵。透过提出养格力犬会遇到的不同问题，希望领养者并非一时冲动。

以下为原文转载。（Bambiland - Photography and Dog Training授权转载）

‘超长文’呢排热话系讲紧领养澳门退役赛犬──格力犬 Greyhound。有几多人对呢种犬种有认识？又有几多人接触过？虽然佢哋系好可怜前路茫茫，但不加思索咁就领养，然后仲话倾紧免验疫入口，到底系咪又系好事？
我非常支持领养，但更支持理性地考虑后再领养，而唔系因为叠马、威、英雄主义咁走去跟风领养。因为唔谂清楚，其实只系将佢哋由一个地狱搬去第二个地狱，无分别。
Greyhound 到底系一种咩狗？网上好多描述都只系话佢哋系猎犬、然后咩非常友善，对人对狗对小朋友都超级好。但到底系点呢？我自己接触得唔多，但呢方面嘅资讯有一位主力推动澳门救格力嘅朋友确认过，佢非常熟悉而且都接触过场内嘅狗好一大段时间，佢自己都有养。所以都算几准确。
大约 list 下领养返来嘅 greyhound 会有乜嘢行为或性格问题，再自问有无条件养得掂，然后再谂领养。当然得嘅，希望你哋去马，帮帮手！

更多相关文章：澳门狗场600多只格力犬前途未卜　舒淇呼吁领养：求求你了！

Sleep Aggression 
Greyhound常见到嘅问题。（update：有澳大利亚义工分享佢哋果边比较少见） 唔知系由于基因定系遗传定系赛犬训练嘅问题，好大部份嘅 greyhound 都有唔同程度嘅 sleep aggression 问题，而呢种问题系极难利用训练修正，而且成功率好低的。你只能用环境管理嘅方式同佢慢慢磨，磨到佢得。

Sleep aggression，顾名思义即系瞓紧觉时，唔埋得身﹑唔搞得，甚至有机会行过都唔得。唔得即系点？轻则凶你，重则咬你。就系咁。

“瞓紧唔搞佢咪得啰”可能你会咁谂，都好正路。不过，格力犬一日有8成时间瞓紧觉，然后佢瞓紧觉同唔瞓觉嘅时间，都一样系摊系到唔郁同埋开眼的，你分唔分到佢边一刻系瞓紧？ 

Predatory Behaviour
Greyhound 系视觉型猎犬 (Sight Hound)，主要以视角追赶猎物然后捕捉。屋企有养猫、雀鸟、兔等等细细只又郁嚟郁去嘅嘢，最好唔好谂，或者你可以做足 management。虽然唔系100％ 会有，但机会都高的。Predation 即系乜？即系要对方死，早前写过。

超严重社会化不足
赛狗生涯只有训练同埋跑，完全无社会化可言。所以对人对狗都系，一系就超自闭会闪避会匿埋、一系就超兴奋；澳门狗场领养果堆系无中间的，一系就好惊一系就好兴奋，所以要有心理准备拣边种都系要慢慢 train up 返去中间位。

因为社会化严重不足，所以都好多时会咬嘢﹑见狗紧张﹑见人紧张等等，一惊就甩绳，一甩绳就大镬了。

Touch Sensitivity
格力犬唔钟意人摸，唔知系社会化问题定系身体结构问题，对人摸系好敏感的。

先天结构保护弱
格力犬无毛发无脂肪，基本上一定要 manage 好唔可以同任何狗打交！一打好大机会就超重伤甚至死亡。

关于体力放电
有网上人话要咩好多时间同佢放电，其实都唔系。佢哋体力好差但爆发力好强，反而要问自己可唔可以有环境𢌿佢尽情跑，或者有无闲情成日车佢去跑。如果领养完放佢系屋企的话，佢哋会屈到病的。情绪病嘅下场都系咁上下，唔多讲了。

如果你会同佢痴线咁放电的话，唔好多过5分钟，稳阵少少3分钟到好喇。唔系佢哋就会趴咗系到，你预咗抱佢走了。但咁重嘅狗，我自问抱唔到佢返屋企喇。 XDD

睇完都觉得自己可以比到空间﹑时间同埋manage 到的话，记得即刻去马！来紧都仲会有领养日的。虽然目前返港手续上有困难，但应该好快会有转机。
如果自问只系出于同情心或英雄主义想领养嘅，帮手分享唔同资讯同领养渠道，令有能力嘅人睇到然后救佢哋走，咁样反而更好。
共勉之。

后记补充：
以前有介绍话利用时间点嘅学习方式 (Temporal Conditioning)，格力犬系呢方面系高手。所以佢哋嘅生活习惯系需要好耐先改变到。如果佢瞓开个仓系好早或好夜起身活动的话，你就要有呢个预备系陪佢癫。

UPDATE：留言有真实澳大利亚退役犬嘅用家分享

(https://www.facebook.com/photo.php?fbid=10155839332028335&set=p.10155839332028335&type=3&theater)

再 UPDATE: 其实我唔系想令人觉得格力系好难搞嘅犬种，我只系讲紧澳门呢堆狗你有机会遇到嘅问题。所有严重社会化不足嘅狗都有机会遇到嘅问题。有呢堆问题加埋格力比较唔愿意改变或常瞓觉嘅天性，你需要更多嘅耐性同埋时间去磨合。
另外，格力犬用嘅颈圈同埋胸带都系要订返黎的。以胸带为例，得意大利名牌 Haqihana 有格力犬胸带，贵到 hihi。唔好拎咗返来见买条带都贵过人又觉得中伏。

更多相关文章：600多只格力犬仅6只确认领养 澳门逸园7月1日再办格力犬领养日