庄思敏自嘲中学时期粗鲁又样衰　作为运动健将多女追

昨日盘点了十位 TVB 现役女星的学生相，意外发现学生时期的庄思敏(Jacquelin)，当时不施脂粉的她更显清秀，得到一众同事肯定，我哋特地揾当事人回应两句，现正身处杜拜的庄思敏一听到学生相又被掘出，竟然表现得相当无奈，佢直言：“我觉得学生时期嘅我好丑样。”

Jacquelin形容中学时期嘅佢，系一个蓄短发同箍牙嘅女仔，“当时亦完全唔贪靓，由于觉得当时嘅自己一啲都唔靓，所以好介意中学同学喺Facebook tag 我啲旧相。”

身高1米76嘅Jacquelin早年以模特儿身份出道，中学时期系一名运动健将，玩好多运动，包括打篮球、跑步、跳高、推铅球，由于佢就读香港真光中学，如果留长头发就要扎孖辫，所以为咗方便运动，中二时就开始剪短头发。短头发加上系运动猛将，斋听都觉得佢中学时期应该好型，唔难想像佢中学时期应该好多人追，“我中学系读女校，好少接触男仔，所以追我𠮶啲都系女仔。”

Jacquelin仲话自己读书𠮶时好粗鲁：“因为系读女校，平时学校全部都系女仔，所以唔会好著重仪态，尤其真光校服系旗袍，平时带活动或者跑起嚟唔方便，我成日称起条裙就跑，里面著晒打底裤。”估唔到依家成日Full gear 现身嘅Jacquelin，原来喺中学时期咁不拘小节！