唔开心、讨厌香港、有钱，点解唔走？

有人话沈旭晖冇承担，讲风凉话，置身事外，“唔爱港”。哗哈哈。首先我唔知点解佢，或你，或我，要爱港。又唔系选特首……好似犹太人咁阿美尼亚人咁库尔德人咁，心中有香港就边度都系香港。

我钟意睇戏，但可以的话避免睇太心灵鸡汤、太热血、太懒系有 message 嘅戏。原因？因为无论戏入面主角点忠于自我点追求梦想点荡气回肠荡埋十二指肠都好，睇完戏，第朝都系继续营营役役准时上班。所以星期六戏院最多人。我建议星期六夜晚收双倍价钱，歧视万岁，发梦系有代价嘅。

不快乐源于冇钱冇民主？　但古巴人都开心过香港人

俄国文豪托尔斯泰82岁先离家出走，追梦永不太迟。好热血呀可？不过着多件衫——托尔斯泰结果中途肺炎死埋。话虽如此，每逢睇到果啲咩“30% 学生谂过离家出走”嘅新闻我就好担心——我好担心剩低𠮶 70%。的确，面对不如意边个完全冇谂过一走了之？18 岁可以咁谂，80 岁都可以咁谂。

人识得游水，熊啤啤都识，但佢哋唔系两栖类。你去过瘾你去捉三文鱼，同你“在水中生活”系两回事。之前 01 博评已经有专题讲出走，但我今次讲嘅系真出走。唔只系去读几年匈牙利文，或者去墨西哥做几个月义工，最后都系返嚟呢个城市得个做字𠮶种。系真系就此成为另一地方嘅人，好似呢排好多人讲嘅沈旭晖咁。移民，转跑道，着草，逃出香港，新生活，咩都好。我同沈旭晖不同界别，本身不相识，但我同佢同年，有共同朋友，我间中学都有皇冠头（当然比不上佢𠮶间），佢讲嘅我都有共鸣。

我唔太信啲乜乜调查，但问一句，香港人开心吗？应该人人都答唔开心。就算自己开心都觉得其他人唔开心。香港人点解唔开心？冇钱？又唔系啵。我见啲朋友一年去几次旅行晚晚米芝莲都唔开心。冇自由冇民主输到只剩下钱生不如死？明明我就见古巴人都开心过香港人，大陆人都好似开心过香港人。

点解香港人唔开心？写几万字都未写完。但要讨厌香港，实在有好多好多理由。唔使估，你同我嘅理由多数都唔同。可能你最憎香港就系有我呢啲咁嘅人，反之亦然。重点系，大家都唔钟意香港嘛，对不？一百万的问题就系：点解唔走？

当年移民牺牲大　如今何其廉价

都话我同沈旭晖同年，对上一次香港移民潮，我仲系小朋友。人人惊回归，“恐怕这个璀璨都市光辉到此”。当年我屋企唔系草根，但肯定未有资格谂移民，只有得闲唱下《话知你 97》，睇下众多当年的港产片（例如董骠的《富贵逼人》）想像下。倒系当年有朋友或同学举家走人，亦有不算太熟的亲人走去英国开餐馆。

相隔咁远嘅历史好难相比，当年大家灰心啲定而家灰心啲，都好难量度。但我想讲嘅系，当年你父母或祖父母移民，要嘅勇气比今日大好多。讲语言，现在啲小朋友再差，都有得成日上网或在手机打不甚正规的英文。当年大把阿叔阿婶真系 26 个字母都唔识就走去番邦过世。而家番邦中餐馆一街都系，听闻不少仲正宗过香港，大把港片港剧睇。当年就唔系咁回事，今日的配套，系当初𠮶一班勇士搞出嚟。而且，当年好多中产本身在职场都爬到一定位置，唔似今日你同我咁觉得上唔到位，冇乜机会成本。

仲有当然系科技嘅进步，而家打电话都嫌老套 WhatsApp 打字都嫌烦。你好难想像我细个打长途电话仲要有接线生，仲要开部录音机录录音带寄去英国。而家？姑姐落街打边炉都可以直播畀你睇。嫌睇片冇 feel？30 年前飞去英国好似成万蚊，而家唔使。你计埋通胀就更加惊人。而家移咗民留咗学，一年返香港几次嘅，大有人在。

老套的一句，海外存知己，天涯若比邻。朋友 A 在新加坡工作，我去开狮城就揾佢打边炉，从冇觉得佢离开我好远——反正在香港都唔系个个月约出嚟食饭𠮶种。朋友 B 在杜拜工作，上个月我直头带埋个炉飞去打中东边炉。朋友 C 在北京，但一年返香港几十次，我怀疑佢在香港时我都冇见佢咁多，旧年圣诞做冬先同佢去北京“东来顺”，佢仲唔使交税畀香港政府，仲有得拎六千蚊，几爽。朋友 D 在东京做嘢，楼都买埋，我冇一年去几次日本，但见不少人揾佢 shabu-shabu（我都有）。

四位朋友，年纪同我相差唔超过两年，完全唔同职业，大家都极普通家庭出身，亦只系在香港读大学，绝冇赢在起跑线，但最后各自揾到一片天。当然睇 Facebook 永远你睇人好人睇你好，但目测佢哋好似比我其他朋友更为开心。

有钱都唔走？　改变现状谈何容易

当然，在外国生活定居唔同去旅行或做一年义工，大把问题要解决。主要的问题当然唔系有冇护照识唔识当地语言。主要问题系有冇钱。对，世界十分现实，我唔爆人私隐，但常识都话你知我四位朋友唔系初出茅庐揾一万几千做喽啰。沈旭晖屋企都装一万本书啦，对不？

所以，冇钱冇得讲，但亦难听讲句，冇乜资格讲。因为你都冇得拣。但我目测身边不少捞得较掂的朋友，各行各业，对香港都心灰意冷。明明又应该财政上 OK，亦都有谋生技能，点解唔走？

睇戏，就个个讲逃出 comfort zone。现实，谈何容易？上一次移民潮嘅，可能比我身边的朋友富贵，但佢地要嘅勇气，不见得会少。你睇励志心灵鸡汤会教你，改变唔到环境，改变你自己。改变唔到你自己，改变你心态。心态都改唔到呢？当然，系可以走。但听闻，而家好多人打工连 relocate 都唔多愿。有得去矽谷就谂下啦。踢佢返大陆或者去杜拜食尘真系宁愿唔捞。

心中有香港　边度都系香港

十几年前初入职场，教书年代，校长讲个故仔我好深刻。当时新学校，成班新老师，十分热血。校长话成班马骝梗系揽头揽颈，但到有一日有人跳咗过对面河，其他跳唔到，就只只吱吱叫揾花生（定蕉？）掟佢了。

有人话沈旭晖冇承担，讲风凉话，置身事外，“唔爱港”。哗哈哈。首先我唔知点解佢，或你，或我，要爱港。又唔系选特首。我亦不知道，当年移咗民𠮶啲爱唔爱港。甚至不少最后又回流，又爱唔爱港？对，佢哋回流仲坐住高层位，霸住茅厕唔拉屎，阻住你上位，仲炒贵埋你层楼添。佢哋爱唔爱港？

我比较相信沈旭晖讲（希望我冇解读错），呢个 1,100 平方公里嘅香港，就肯定会沦陷啦。但唔紧要，好似犹太人咁阿美尼亚人咁库尔德人咁。心中有香港就边度都系香港。心中有爱就日日都情人节，心中有鬼就日日都万圣节。

讲咁耐，我又点？我冇钱。选择去台湾。多边炉打。成班 diaspora 围炉取暖打返港式边炉。谂起都爽。

（本文纯属作者意见，不代表香港01立场。）

Facebook:

#李声扬：“睇戏，就个个讲逃出 comfort zone。现实，谈何容易？……听闻，而家好多人打工连 relocate 都唔多愿。有得去矽谷就谂下啦。”

全文：

#BlogJamming