黄伟文解构张敬轩新歌1985密码　再开作品展可能要等到2022年

Wyman黄伟文昨日出席时装品牌活动，席间接受《香港01》访问，解构为轩仔张敬轩谱词新作品的密码。事源近日Wyman在Facebook上披露了轩仔下一首新作品的歌名，在图片中清晰看见《天才儿童 1985》这歌名以及歌曲班底。歌名一出，引来不少网民好奇，到底《天才儿童 1985》的1985是指什么？是一个年份？一个密码？Wyman在社交平台上一直未有清楚解释，而网民亦开始“齐来竞猜”游戏，有人猜想1985年是一个伟大人物出生的年份，也有人表示轩仔是1981年出生，应该与他无关。

昨日访问中再次提到这个歌名，Wyman终于解话：“其实1985只系一个约莫嘅时间，其实我系讲紧𠮶一代嘅人，不论81、82定系87都得嘅，主要都系𠮶个年代出生嘅人，而家大概三十几岁风华正茂。所以其实我系讲紧𠮶个年龄层，而唔系特定某一年，因为我唔可以写做《天才儿童 八十年代》或者《天才儿童 1981至1989》，于是就写成呢个艺术上嘅约数。”

而《天才儿童 1985》亦内含另一个玄机，因为他在社交平台上表示这首作品的序号是1399，亦即意味著Wyman再下一首作品，将会是第1400首，到底在Wyman心目中，他会为这别具纪念性的第1400首预留了什么位置？想交由谁人唱？主题又是什么？访问中他透露：“写咗词咁多年，我觉得一啲特别嘅数字，其实系唔特别。如果𠮶个特别嘅数字，我专登搞到佢好特别，我就可能会留返畀一个人我觉得好特别嘅人唱。但我觉得人生系应该随缘，所以每次写到呢啲特别数字，我就望下啱啱排到边个，如果睇返我历年呢啲齐头数嘅歌，其实大部份主唱都系我冇预计到。例如我第500首作品，其实系一首属于小雪嘅歌，但小雪都唔系一个同我特别相熟嘅朋友，所谓Go With The Flow就系咁。”

对于这个“数字”问题，虽然Wyman表示一切随缘，但提起又似乎乐此不疲，他续道：“我记得我第一千首嘅作品系一首陈奕迅嘅歌，如果一定要做牌，我会做第1500首，不过以我近年嘅产量，都唔知几时先写到啦。都可以讲下嚟紧第1400首，其实排好咗应该系一首莫文蔚嘅歌，除非有突发事情出现啦。上一次写莫文蔚嘅Solo歌已经系第100首左右嘅事，所以都隔咗千几首，大概二十年前嘅事啦，我谂当中都有命运嘅意义啦。”

不知不觉，Wyman已踏入填词界25年，2012年曾开过一次作品展，不少乐迷也相当回味，到底Wyman会否衬机再开一次作品展？他坦言：“呢一秒钟你问我，我都仲系想开嘅，不过唔会系呢一两年嘅事啦，可能要隔够十年先去做。但去到𠮶个时间点，个世界仲系咪适合畀我去做一件咁嘅事呢？其实好难讲，世界变化得太快，上一次2012年开，当时嘅世界都同而家好唔同，如果再去到2022年嘅时候，我尽量希望可以做到。”