【热评】毛记葵涌上巿　老细几亿身家扮废青？　非毛粉的3点观察

文：李声扬缅甸有这么一个传说：有一条恶龙，每年要求村庄献祭一个处女，每年这个村庄都会有一个少年英雄去与恶龙搏斗，但无人生还。又一个英雄出发时，有人悄悄尾随。龙穴铺满金银财宝，英雄用剑刺死恶龙，然后坐在龙尸身上，看著闪烁的珠宝，慢慢地长出鳞片、尾巴和尖角，最终变成恶龙。──《在缅甸寻找奥威尔》

利申：从来唔多钟意《100毛》或毛记（《黑纸》年代就几钟意），亦都少睇。我亦十分怀疑佢哋嘅前景。咁但，本人唔钟意又唔代表冇人钟意，我睇淡又唔等于人哋会执笠。直到呢一刻为止，毛记都系相当成功。至于一众毒L帮人擡轿睇人发达系咩感想，就如人饮水冷暖自知。

认叻都要讲句，大半年前毛记申请上市，我写过篇博评，白纸黑字标题《毛记上市后嘅市值，有可能拍得住壹传媒》，应该全香港冇人咁写/敢写。即使由高位急回大半，而家（3月29号星期四收市）市值都仲大过间壹传媒，亦都大过星岛及经济日报集团。

之后会点？冇水晶球，答你唔到。但毛记上市，引起社会热话，有几点观察可以分享下：

第一，香港地，都系憎人富贵厌人贫，把口就话唔应该用分数用金钱衡量人，但到头嚟个个都系。此话何解？话说之前蒋元秋睇唔起毛记脑细，咁上市首日就有人抽水，话毛记市值而家仲大过蒋元秋屋企档震雄集团（57）云云。See？最后都系金钱数字衡量人。而当然第二日毛记股价大插一半，市值已不及震雄，就冇人再出声。网络年代，最紧要做半日英雄。

第二，毛记相当成功，但上市当日根本冇你想像中咁“破格”，更加冇咩咁颠覆。上市唔著西装？佢唔系第一档，之前大陆佬已经做过。揾专家Dickson上去讲嘢？一样，其实港交所只容许董事咁做，但毛记一早特别申请咗。See？最紧要守规矩，一早打招呼，计算准确。就好似谢霆锋掟结他咁，呢种系marketing of demarketing，计算晒咁去“反传统”。系呀，我嘅Selling Point就系反叛，但重点系Selling Point。颠覆？你唔见佢出嚟嗌“我要真普选”或者“结束一党专政”？最好笑仲有人批评佢哋唔庄重，大佬，上市敲锣咋，有几庄重？毕业礼一样个个玩嘢啦，立法会宣誓都有人照玩啦。平时个个想破格，呢啲位又道德L上身了。同样道理，财经记者平时就觉得啲大陆佬讲嘢假大空索然无味，整个Dickson够破格咯，结果发现写唔到稿，变成娱乐版，心中宁愿听返大陆佬吹水好过。

第三，几亿身家扮废青真系好爽。有几爽？我都唔知，因为我冇。但有钱人并唔系你中咁快乐 - 因为你根本想像唔到人哋有几快乐。唔好误会，我虽则唔钟意《100毛》亦唔钟意脑细，但我绝不仇富。我觉得佢哋嘅故事不知几励志，新一代成日话废老阻上位租金又贵，脑细话你知，唔靠父干唔靠炒卖唔靠呃人唔靠刷鞋，一样可以白手兴家。

只系我谂紧，脑细等人，各自几亿身家，讲真正常成世都用唔完，之后仲点扮废青？唔系话毛记必然会庸俗化商业化建制化（虽则机会唔低），反正做content嘅都未必系佢地三位。但，都系𠮶句，几亿身家出嚟讲嘢，仲点同啲穷酸网民有同理心？

文首嘅故事讲得好清楚，恶龙最初都系英雄，林郑同梁锦松学生年代一样系社运活跃份子，你公司个仆街老细年少时可能仲热血过你。但权力金钱改变人性，古今中外皆然，唔使咁介怀

好似Beyond黄家强咁，喂，以前就话寒酸band友愤怒青年啫，原来住何文田又几个单位收租又好似有工厦有写字楼嘅，咁你仲点出嚟《我是愤怒》啫，有乜咁多愤怒？租客迟交租定租唔出去？

睇开啲，我见好多朋友甚至后辈，买楼前买楼后都变咗两个人。你亦听过好多故事，人在经历啲巨变后，往往价值观大变。可能系撞车，可能亲人过身，亦都听过大把有钱人破产或重病后睇嘢都唔同咗。咁一样啫，脑细几个新界仔（利申：我都系新界仔），由一无所有变成四十岁唔够已经几亿身家，个冲击咁大，会完全“莫忘初衷”？咪讲笑。唔好怪人哋变，系局外人太迂腐。

咩系建制，睇你定义有几阔。但我真系无乜见有人几亿身家仲可以反建制，最多系肥佬黎（而大把人已经当佢都系“建制”）。 印象中，得一个人系可以几亿身家都反建制 - 就系拉登。所以叫“恐怖大亨” 唔系浪得虚名。呢啲就真系有理想啦。

狭义嚟讲，by definition，上市公司大股东，点可能唔系建制？几亿身家仲点可以系玩嘢冇成本？一个唔该长期停牌，咁点套现？唔好忘记脑细三人几亿身家暂时系帐面上咋。

（文章标题由《香港01》编辑所拟。文章纯属作者意见，不代表《香港01》立场。）