【逆缘】金牌监制王心慰出奇招　陈家乐做黎耀祥阿爷：贪佢够正气

曾打造《烈火雄心》系列、《枭雄》的无线金牌监制王心慰（Amy姐）一向都系质素保证，而佢监制嘅新作《逆缘》亦将会喺下个月初正式首播，黎耀祥、姜大卫等演得之人孭起套戏固然令人期待，但最令人觉得新奇始终都系揾咗平时拍开电影嘅英皇艺人陈家乐演出，仲要系饰演姜大卫老窦，即系黎耀祥阿爷。哗！Amy姐呢步棋真系行得几妙。

点解会揾陈家乐呢？Amy姐就话贪佢个样够正气：“好Fit做1945年啲游击队，个样好讲仁义道德𠮶只。（但无线亲生仔都有呢类㖞！）本身角色安排已经好新鲜，再用埋外援成件事会再出啲再抢啲。（唔睇价钱咁请？）最紧要件事系正，我从来唔帮公司悭荷包！”又话出到嚟效果好，会继续揾陈家乐嚟无线助阵。

Amy姐现时亦正筹备另一套新剧。新剧会唔会揾其他外援？佢就话未定，但有都唔出奇：“讲返家乐，其实佢真系好快上手，始终系后生仔，好快就适应到。不过，我喺开拍一个月前就吓鬼陈家乐，叫佢不断睇粤语长片，学几十年前嘅人讲嘢嘅神韵，结果未埋位、净系试造型已经好入戏。”