【多图】星妈影初生BB相热潮　个个都超萌劲可爱

以前唔系人生大事例如结婚、摆大寿，都唔会劳师动众揾专业摄影师影相。随住摄影普及化，婚纱相都可以影十辑八辑，仲有近年流行嘅大肚相以及初生婴儿照。官恩娜公开囡囡BéBé A “模特儿初体验”靓相，又扮熊仔又扮蚕虫相当可爱﹗其他星妈星爸都有赶潮流帮BB留倩影，原来影NewBorn Baby已经成为新热潮啦﹗

【小Model．多图】官恩娜初生B女留倩影　BéBé A托头微笑劲可爱

近年兴起初生BB摄影潮，价钱由几百蚊至近万蚊不等，分为到影楼拍摄或上门到家中拍摄，好似官恩娜帮衬呢一间，上门到家中拍摄，包晒BB衫仔同道具，最平嘅拍摄套餐2小时30分钟要价约6000港元。虽然依家人人拎住部手机都可以随时影相，不过专业嘅初生BB相其实唔系㩒个掣咁简单。

曾远赴澳大利亚跟名师学习New Born拍摄技巧嘅摄影师Irene Chui 就话，其实初生BB相喺外国早已流行：“上门定影楼视乎客人需要，比较传统觉得坐月唔方便出门会Book摄影师上门，如果想有多啲道具可以到影楼，其实都有齐照顾BB嘅用品和设施。”相中BB又要托头，又扎埋一旧，大家都会相当担心会唔会扭伤BB。Irene就话其实唔使过虑嘅，因为呢啲动作都系摹倣紧BB喺妈咪肚入面嘅姿态：“初生婴儿身体比较柔软而且入睡时间较长，所以会待他们熟睡身体放松才会摆姿势。绝不会硬屈他们手脚。”

大家睇相可能会奇怪点解BB通常瞓紧觉，其实都系有原因嘅﹗影过数以百计初生BB相嘅摄影师Irene就表示：“影呢类相最好喺BB出世后首两星期拍摄，当中以7至14日期间最好，因为呢段时间皮肤最幼嫩，出生时嘅暗粒同面黄都渐渐消失，而且BB九成时间都瞓紧觉，不难发现佢地会喺睡梦中忽然笑起嚟，所以呢段时间影出嚟嘅相会特别可爱。”