【补办婚宴】吴日言古迹摆酒　先等入会再经英文面试：比想像中难

依家喺香港地结婚要摆酒，闲闲地都要早返一年半载，除咗因为要储钱，原来想BOOK个心水场地都唔系一件容易嘅事。吴日言同男友Barry爱情长跑足足17年，到2016年10月正式于日本冲绳拉埋天窗。又过咗年几之后，终于喺香港补摆喜酒，吴日言接受《香港01》访问时话：“我都估唔到场地面试都要成7个月﹗”到底佢拣咗个咩婚宴场地咁厉害呀？

结婚一年补摆囍酒

吴日言做咗林太已经有一年几时间，到1月27日先喺香港筵开十围补办婚宴，圈中人就只邀请咗江若琳同男友萧润邦，茜利妹以及DJ Leo。睇相见到Yan全晚只著一套红色心型胸晚装长裙，配上简单妆容以及金器，拖住老公满场飞同宾客影相。细心睇呢个场地相当精致充满英式古典味道，原来系位于中上环区嘅The Helena May（梅夫人妇女会），Yan接受香港01访问时就话：“其实喺呢度摆酒比自己想像中更加唔容易。”

过百年法定古迹

原来喺冲绳行礼之后，Yan同丈夫都想喺香港补摆喜酒：“但拣场地时就唔系好想一般酒店，成日去饮觉得好闷无咩特别，加上围数唔多想揾啲靓啲袖珍啲嘅地方。”直至见到呢座位于半山花园道，别具维多利亚及爱德华古典复兴式建筑格调嘅大楼，Yan就一见倾心决定喺度摆酒，估唔到呢个先系重重难关嘅开始。

这座位于香港中环花园道35号的梅夫人妇女会主楼（The Helena May main building），于1916年落成，香港日治时期曾被日军占用作为会所和马廐，二战结束后又曾被英军短暂征用，后来香港女童军亦在此成立首个总部。1993年，建筑物主楼被政府列为法定古迹。

搞足大半年先入到会

Yan一查之下先知道要喺度摆酒先要做会员：“以为做会员啫，递表就得，原来系要人推荐，身边又无朋友系会员，只能自己写信自荐，职员话写完信要等两个月收电邮去面试。面试当日，有两个外国人同我全程英文面试，自己咁大个人，见工都未试过要全英文interview，等面试要等一个月，面试完又要等一两个月先知结果，足足大半年时间先做到会员先可以book场。”

虽然搅足咁耐，Yan依旧觉得相当值得：“要有一个心仪地方办喜事，排队真系排足7个月，宜家连结婚都要排队，都相当值得，咁有古典气息嘅地方，切合我同老公嘅爱情故事，一样都系咁细水长流。”