【万千星辉．博评】女演员赛果跌烂唔少人副眼镜？只因睇漏：王晶

《万千星辉颁奖典礼2017》赛前嘅焦点落晒喺王浩信同马国明嘅“视帝之争”，仲有《降魔的》同《踩过界》嘅最佳剧集对决。最后王浩信封帝，马国明就继2012年《On Call 36小时》之后第二次得到“最受欢迎电视男角色”，平咗林峰嘅纪录。最佳剧集就由全台总动员嘅《夸世代》夺得，《降魔的》得到“全球网民最喜爱剧集”叫做拎返个安慰奖。呢几个名单都系大家心水之内，只系估边个拎咩奖。至于视后、最受欢迎电视女角色、最佳女配角就跌烂咗唔少人副眼镜。

TVB一家人　余党受压

我之前喺自己个Facebook page预测今年颁奖礼嘅赛果，以无线正值捧人接班之际，一众企稳一线嘅演员，好似宣萱、三哥都系冇机会，因为要用奖帮人升level，情况有啲似当年胡定欣第一次拎视后咁。基于呢个大前题，我估视后系李佳芯、最佳女配角系林淑敏、飞跃女艺员系朱晨丽，结果全部灯晒……估Ali封后，系因为Ali系余小姐嘅人，亦都喺《夸世代》同埋《踩过界》交出成绩，点知今年高高层要用颁奖礼宣传“无线一家人”嘅讯息，近年独领风骚嘅余党喺咁嘅气氛之下受压。Ali冇缘视后，宝座落咗喺赛前突然大热、就嚟要倾续约嘅《不懂撒娇的女人》唐诗咏。至于点解我估女配角系《爱．回家之开心速递》林淑敏，系因为男配角我估唔会畀到何远东，而每年嘅男女配角其中一个都系顺民意而生，唔系何远东就应该系“大小姐”。好可惜，我平衡咗唔同派系加埋少少民意，但系睇漏咗一个人：王晶！

升level拍电影

直至我见到“最受欢迎电视女角色”同埋“最佳女主角”嘅颁奖嘉宾系王晶时，我先如梦初醒：无线依家有多一个派系影响大局，就系王晶嘅“星王朝”。星王朝电影公司，喺冇几耐之前先至同无线同埋邵氏签约，以后王晶就同无线紧密合作，开拍电影、网大。当然王晶唔会要啲无名小卒，喺已公布会拍电影嘅无线人，名单暂时只有三个，其中一个系大部分人觉得已经企喺一线嘅袁伟豪，另外两个就系拎咗“最佳女配角”嘅朱晨丽，同埋“最受欢迎电视女角色”嘅蔡思贝。

山头主意难消灭

有观众话今年嘅赛果爆冷，如果呢个结论系因为同民意差太远嘅话，咁少年你就太天真。大台近年都唔系好睇民意。大台颁奖礼只系各个势力强弱嘅指标，背后有迹可寻。当然我依家系马后炮，下年如果估边个会得奖嘅话，要睇无线内部、合拍单位、邵氏，仲有星王朝。高高层想消灭山头文化似乎系冇可能嘅事，之但系如果各个势力平衡得宜，各个部门互有精彩作品跑出争上位，咁都系我哋观众之福。

（本文纯属作者意见，不代表香港01立场。）