【X你的世界末日．剧评】两个细路，帮你做晒想做又唔敢做嘅事
《X你的世界末日》（The End of the F***ing World）讲一个自认 psychopath 的 17 岁青年，同一个喺屋企得唔到爱嘅少女，组成一对孤独苦命鸳鸯离家出走嘅故事。两个细路竟然因为无聊无比的小原因，闯出一个大祸。欠一条神经的少男同太神经的少女，对世界所有嘢都不满，却又对世界上所有嘢都无能为力，佢哋只不过系世界里面的其中一条毛，但佢哋有勇气去 fuck the world，令感到生活苦闷、返工抑压到爆的观众打了一支强心针，睇完正能量 get。
厌世少男和反叛少女用消极态度去对抗万恶嘅世界，用鸡蛋丢高墙㖞，观众一边睇一边化身鸡蛋一齐做 back up。有乜嘢可以开心得过 fuck the world？就系齐齐 fuck the world。
顺带一提，里面小菲最钟意就系《Walking All Day》𠮶支歌仔，系 Blur 乐团嘅 Graham Coxon 啊，听声就已经兴奋。
【编按：以下内容含剧透，逃生门在此。】
Stage 1：首先，你要揾人同你 fuck the world
我本来想一个人富贵，但原来两个人共患难先系最难能可贵。随同呢个叫人疯狂的 fucking world 而来的，只系无数对世界的厌恶和憎恨。James 喺 6 岁时目击母亲自杀，老窦内敛地爱但又唔识开解，Alyssa 亲生父亲出走，老母再嫁再生，继父当自己冇到。两个人一直在考虑应该点去拯救自己，男嘅打算杀人试下可唔可以揾得返啲感觉，女嘅想出走寻求另一个依靠（亲生老窦）得以将自己从呢个讨厌又无趣嘅生活里面拯救出来。一开始两个人都不过在追求“对自己嚟讲”更好嘅生活，但出走嘅过程里面慢慢发现到，原来有个人可以一齐共患难，先系最高无上。呢啲咪系跌咗个橙，唔觉意执返旧柑啰。
Teen dramas 畀到你嘅嘢系普通大人世界里面无嘅嘢——一份天真，彻底扭转局面嘅希望，同埋改变世界嘅力量。呢啲嘢通通都好难喺真实世界上演，所以大家先会睇得咁开心咁咬牙切齿；因为你哋想做又唔敢做嘅事，由少条根嘅 James 同又怕事又要试嘅 Alyssa 一次过帮你做晒。
Stage 2：揾到个伴了，就管他妈的世界如何，用力 fuck the world！
想喺疯狂的世界里面做正常人，定系想系正常嘅世界做疯子？对佢哋嚟讲两样嘢根本无分别，佢哋只不过想 rule 自己的人生。一次过做晒所有正常青少年少女做完会畀人闹嘅事，做埋正常人唔会做嘅事（系人都经历过的反叛期）——一拳打落老窦度，离家出走，抢银包，擅闯民宅，随街揾人去上床，杀人，潜逃，入油唔畀钱，持械行劫……所有唔畀做嘅嘢通通一次过做晒。有个伴了，就够胆 fuck the world。如是者，观众如你如小菲，睇住电视代入 James 同 Alyssa，同套剧一齐 fuck the world。
愈坠落愈快乐？Who cares！再讲一次：想喺疯狂的世界里面做正常人，定系想系正常嘅世界做疯子？唔好话对 James 同 Alyssa，就算对你对小菲都无分别。我哋只想自己嘅人生自己话事。
Stage 3：X 下 X 下通常都会动摇，但系要记住对自己嘅信心要拿稳
剧里面好几次提到 Alyssa 对性着迷，这里所讲的唔系青少年对性嘅好奇。Alyssa 想透过同人发生性行为去证明自己长大，可以掌管自己命运，可以决定自己人生。事实上好多女仔都系咁，大家都清楚好多女仔（或者男仔都系）想要用性嚟证明爱真系存在（或者存在过）。更普通的就系好多男人都会利用性或是性相关的行为来引发其他对方的妒忌。讲到尾，Alyssa 喺缺爱之下的情况成长，面对救生艇（James）就好想用力抓住；而且佢觉得如果佢唔主动，好可能就会失去。
呢份进击同盲目都可以放落 Alyssa 见完亲生老窦之后，发现老窦到头来都只不过系烂人一个，但 Alyssa 选择只眼开只眼闭乜都睇唔到，无非系因为佢咩都唔想理，事旦抓住啲嘢去证明一份属于自己嘅爱实实在在咁出现过。
做人嘅嘢又大胆又心虚好平常。心虚嘅时候开始唔信自己，好多人呢个时候就会揾啲嘢去开始“迷信”。因为小菲同你一样，都试过口不对心，都试过以为世界无希望，都试过事旦想揾啲嘢做寄托。爱一个唔爱你嘅人，打一份唔钟意嘅工，往往因为无自信心所以唔敢跳出新局面。Alyssa 在迷失的时候身边好在有 James，我哋在迷惘的时候好在有《X 你的世界末日》；走出去就系差你够唔够胆行𠮶一步……
Stage 4：坎坷过后有艇搭——明明只想救自己，但我竟然end 咗个 fucking world 兼学识了爱？
本身我哋只系 stage 1 想弱弱地想喺呢个好令人讨厌嘅 fucking world 里面寻找拯救自己的方法，但系竟然喺呢个 drive us nuts 嘅世界里面用疯狂嚟成就爱。James 本来只想透过杀人令自己 feel somthing，扮住 fall in love with her 等时机，盲目顺应 Alyass 嘅要求（对佢自己嚟讲亦都冇乜话所谓不所谓）令自己嘅目的可以顺利发生，但佢冇谂过容忍 Alyssa 对世界嘅胡闹，其实系源自自己对佢嘅（溺）爱。
1,000 种阴差阳错嘅情况发生，两小无猜就离家出走；大家都想要从而家最唔满意的生活里面 upgrade 到另一个合心意的版本。点知世界就系咁，你想 upgrade 本身嘅生活咩？结果就 downgrade 畀你睇，你无钱、你炒车、你唔小心杀咗人、你连底衫裤都冇，你冇油钱，你乜都冇！但呢个时候，你发现乜都冇嘅你有嘅系对方！
呢场公路旅程里面嘅重重奇遇翻开咗 James 目击母亲自杀的伤口。Alyass 喺寻找老窦的过程中证实老窦系个切头切尾嘅 shit person，唯一幻想都亲手砸碎埋，人生跌得比先前还要低，乜都冇晒但竟然得到一个永远将保护她（嘅未来同安全）放喺最优先嘅 James。
原来到最后，你唔觉意升咗 level，你以为如开初所讲终于揾到个人可以同你一齐去 fuck the world 就系最好？你最后竟然同呢个人一齐上咗神台。升咗 level 后你发现生命里面出现一个可以令人重新感受生命嘅人先系最重要；然后凭住 fuck the world 的勇气，用自己方式逃离（end）呢个 fucking world 先系 happily ever after！
后记：要记住，并不是每个人都会将你勇敢地揹上身，所以珍惜你所拥有的
James 同 Alyssa 喺加油站遇到同病相怜的男孩，一个在小店里面被打压得不得了的可怜虫。因为佢哋两个半成功的出走，激发起男孩的反抗精神，反过来帮手困住老板娘，谂住执包袱加入同佢哋一齐浪迹天涯。但系你要明白，唔系你想一齐玩，我就要侵你玩，好似继父都冇当 Alyssa 系家人。可怜嘅系亲生老窦若干年系可以同你以 friend mode 聚头，但系讲到“责任”就免了，仲随时会出卖你换通辑奖金呀。
（文章纯属作者意见，不代表香港01立场。）