【星B去旅行】Jasper梁浸浸感情劲好　陈真人仔细细有暖男风范

有一种闺蜜叫郑希怡应采儿黄伊汶，佢地三个差不多时间出道，不过并无因为竞争而成为劲敌，反而惺惺相惜成为知己密友。由工作、拍拖、结婚，到齐齐升格做妈妈，佢地都系对方生命占有重要位置。最近佢地齐齐带埋小朋友亲子旅行，Yumiko呢日上载几张相，原来呢次旅程已经去到尾声，几位小朋友Jasper、梁浸浸以及陈真揽埋一齐，睇嚟同妈妈们一样感情相当好呀。

应采儿嘅囝囝Jasper以及Yumiko囡囡梁浸浸，去年分别参加两个内地亲子真人骚后爆红，风头甚至比星爸星妈有过之而无不及。因为妈妈嘅关系佢地自细已经系好玩伴，其实仲有一个星B就系黄伊汶同陈国坤嘅囝囝陈真。连日嚟Yumiko都有分享旅行相片，继Jasper梁浸浸分享食物之后，呢日嘅大合照都相当有爱，其中一张系佢地坐喺楼梯上，Yumiko写上“Bye Bye.... 我地下次再玩过。”

#多谢弟弟帮我㩒住条裙 #咁细个就咁gentleman｣睇真啲梁浸浸成个翻版牛奶妹一样相当可爱，但原来佢坐低时唔记得合埋对脚，小陈真就帮佢襟住免得走光。两岁都未到就咁有绅士风度，好有Jasper暖男风范咁噃，唔知嚟紧黄伊汶会唔会带佢拍摄亲子真人骚呢？