【黑镜第四季．剧评】仲讲返人类应该点样使用科技？倒退㖞！
开门见山，小菲觉得《Black Mirror》第4季真系有少少失色（相信不少死忠都有同感）。小菲同广大《Black Mirror》粉丝一样，钟情𠮶种将真正嘅悲情结局轻轻咁收喺好似 happy ending 嘅结局里面的讽刺方法；等你一下子准备晒嘢谂住开开心心 happy ever BBQ 嘅时候，下一秒忽然睇穿个故事结尾原来黑到爆；一秒之间立即悲从中来，够晒从天堂掉入地狱的痛楚。
如果你要睇故事发展同对科技嘅幻想力，例如复制的代码人在虚拟世界同真实的人类喺游戏世界里面的互动，又或者将人嘅意识转移到本身身体以外呢啲想像力（呢啲小菲就唔多讲了，讲出嚟永远唔够大家自己去睇咁过瘾），第4季对你嚟讲其实都唔会有啲咩大问题。但如果你系想睇探讨科技同人嘅关系嘅𠮶份功力，可能你同小菲一样都系抱住点都要睇晒嘅心情睇埋佢，煲到季终再低叹一口气。
【编按：以下内容或含剧透，逃生门在此。】
唔通《Black Mirror》被美资入主后威力尽失？变成英美合拍剧嘅关系，卖咗去第二度，target audience 唔同咗，就喺电视尺度上／人民对自己本质的猜疑上都留多咗余地？定系因为愈做愈迷失？定系对科技的幻想黑化设定上有美国电视台畀嘅压力？犹记得喺第1季，仲仍然系纯英片创作的初代，《Black Mirror》真系黑到无语伦比。第1季第1集就强大到叫人隔住个芒都畀佢震慑嘅人猪性交场片吓亲，𠮶种场面同层次，系咪已经系一只英国嘅青春小鸟一去不回来了？
《Black Mirror》一开始最叫惊为天人嘅系佢能够呈现𠮶种科技促进人类“进化”嘅状态。最大卖点系𠮶份人类面对新科技时带来的种种始料未及嘅状况，甚至最劲系《Black Mirror》令你睇到科技点样去影响到人𠮶份心寒，而呢种心寒令人最心寒嘅地方系你会相信不久嘅将来真系有可能会有咁嘅事情发生。
第4季虽然仍然有保留到科技促进人类“进化”嘅状态，但系去到例如《Metalhead》（第4季第5集）𠮶集，好明显就回复返去科技本身无好坏之分嘅层面，即系话又回去“点去使用”先系最大问题嘅情况上。
喂，倒退㖞！嗱嗱嗱，二十世纪开初海德格喺《技术的追问》（The Question Concerning Technology）已经开始对科技本身作出系统上的反思，提及到科技系用嚟达到目而耍出的手段。咁初代《Black Mirror》好明显拎过出嚟发挥，但反过嚟系今时今日仍然有一集系老老土土咁讲“科技好与坏在乎沟通与关怀（在乎你点去使用）”。又讲返去点用呢啲科技系你自己嘅事嘅话，呢种 angle 就无咁有卖力喇。真系童年你与谁渡过……时光倒退二十年！
你知啦《Black Mirror》最叻系讲啲科技到底点样去影响人类嘅行为㗎嘛，而家褪軚倒返转头去讲人类点去用科技㖞，身为坚粉紧系觉得唔系几够皮。虽然未至于会嗌“除裤（回水）！”但相信一班戏迷都好想睇《Black Mirror》讲科技点样去支配人类嘅的行为、点样去影响人类嘅思想呢啲世纪大重点！
小菲特别钟意嘅系第4季第2集《Arkangel》：一个高度关注儿童各方面的育儿 app 如何放大老母爱女深切嘅守护 mode，顺便辅助老母将唔想畀个女接触到嘅嘢通通打晒格；呢种高度控制权暗哑底令老母愈用愈肉紧，愈肉紧愈上瘾，一出事就乜都唔驶谂立即开动。而饱受所有人喜爱嘅《Hang the DJ》亦都有提及身份和存在问题，又有做到科技发展已经去到同人嘅诉求互相结合嘅地步，剧力都唔错。
Having said that，但系无论系小菲觉得最好睇嘅《Arkangel》同外间一致觉得最正嘅《Hang the DJ》都好，都只不过系用亲子对抗嘅张力同情侣为爱冲破一切的爱情力量突围而出；对小菲嚟讲《Black Mirror》第4季多咗讲个人经验，少咗讲科技同人类未来嘅关系，亦都无再咩点去讲技术如何主宰一个特定嘅社会。
以往《Black Mirror》嘅卖点——所谓睇到人心都寒埋嘅冷不防科技令人人性改变、新科技出现后大方向影响社会层面——通通去晒边度？呢啲初代《Black Mirror》有做到嘅大环境，第4季已经好似一个够钱挂住沉迷酒色玩乐变肥仔嘅足球员咁，回晒塘。不过身为死忠粉丝，眼前《Black Mirror》处处出现多季多集共享平衡时空的小 bonus 已经算系花尽心思，小菲当然选择系好系坏坏都照单全收。
总括嚟讲《Black Mirror》将个设定摆去现今人类去接触新科技呢点系做到㗎喇，但高科技世界呈现出嚟嘅大画面？又或者超 sci-fi 构想出嚟的未来基础？就似乎未够过瘾亦未做得够班。第4季的大热都系靠人性而唔系个科技处境勾勒起大家的心。虽然唔同集数都系摆出一个共享宇宙嘅大画面，但单集独立叙事可以话系佢优胜同失败的地方。一集集 standalone 出嚟，呢种分割虽然可以令人全情投入故事情节不受旁节影响，跟住画面就去相信科技可以带畀我地更好的生活（虽然美好通常都系好短暂），但铺陈嘅嘢一做得唔好就叫人好难投入了，网友大打低分评价都无可厚非；而且，第4季《Black Mirror》对未来景愿上的塑造都仍然系差少少。
咁睇唔睇？睇㗎！睇开咪睇埋佢啰，未睇过就无谓由第四季开波喇。由第一季睇起啦！
第四季最爱顺序推荐：《Arkangel》《Hang the DJ》《Crocodile》《Black Museum》《USS Callister》《Metalhead》
（文章纯属作者意见，不代表香港01立场。）