【电视新朝代】毛记很危险

当呢班会上网嘅年轻族群唔再理无线，毛记电视就算贴市到日日恶搞无线嘅节目都无用…无论系风头一时无两嘅《矛盾》，定系其他好似《煮吧！换咗我阿妈》、《悭D啦Honey》咁，ViuTV都将社会议题、政治人物娱乐综艺化。对于以极贴市嬉笑怒骂分析时局做主打嘅毛记电视嚟讲，可以话系正面抽击… ViuTV会杀死嘅，点会系无线呀？毛记再转唔到身，创唔到新猷嘅话，就应该系咁先。

踏入4月电视新纪元，再加上无线业绩继续跌，好多人都话大台今次会受重创。不过如果我上一篇文嘅推断无错，忠实粉丝再加上吸纳咗部分亚视遗留落嚟嘅观众，大台边有咁易死，最多咪跌𠮶5点，反而最大危机嘅系毛记电视。

毛记电视食住大家对大台嘅不满而面世，极速恶搞加上夹到正个时势，吸纳咗一班想睇电视又只系得无线而夹硬睇嘅人转去佢哋嘅怀抱（无电视睇真系会世界末日㗎），将无线同毛记串连，将呢班观众成功过咗户。钟意睇毛记嘅人，大部份都有睇开无线，所以毛记恶搞无线嘅节目先至咁有共鸣咁有回响。由毛记艺员一开始扮无线新闻主播，到节目《六点半左右新闻》、《劲曲金曲》、《星期三港案》、《欢乐满Share》，再到大型现场节目《劲曲金曲分奖典礼》，同埋就嚟嚟料嘅《万千呃like贺台庆》，样样都系由无线嘅经典节目发展出嚟。

你谂下，四月电视界若然真系如大家所愿，大台仆低新台起，边个最快折？系喇，应该系毛记。

其实近几个月都开始有啲蛛丝马迹㗎喇。无线嘅节目，大家已经提唔起兴趣去闹，渐渐退出大家嘅关注范围。焦点就转咗去ViuTV嘅《跟住矛盾去旅行》等等嘅“实况娱乐综艺”节目。有一班等咗好耐新电视节目嘅人，终于都得偿所愿，就算系只系得𠮶条短短嘅预告，都足以令到呢班人走咗去，唔再讨论无线。当呢班会上网嘅年轻族群唔再理无线，毛记电视就算贴市到日日恶搞无线嘅节目都无用。你见近期毛记就算力谷台庆，气势、like数同埋讨论度都不升反跌。再加上ViuTV所主打嘅“实况综艺”，正正回应咗后生仔对于无线节目离地嘅不满，填补返个电视缺口。无论系风头一时无两嘅《矛盾》，定系其他好似《煮吧！换咗我阿妈》、《悭D啦Honey》咁，ViuTV都将社会议题、政治人物娱乐综艺化。对于以极贴市嬉笑怒骂分析时局做主打嘅毛记电视嚟讲，可以话系正面抽击。

依家毛记电视绝大部份节目，都只系恶搞同二次创作，要佢哋搞一个恒常自创节目，现时所见嘅就只有《星期三港案》。但系呢一类实牙实齿嘅节目，又系咪𠮶一班想嘻嘻哈哈嘅网上观众睇嘅题材呢？又或者问毛毛可唔可以handle到呢？

再者，ViuTV摆明车马抢网上市场，未开台先开app，就算系红到爆炸嘅《太阳的后裔》，都决定喺app播完，再喺电视播，完全明白网上观众同电视观众系两个族群（无线推myTV SUPER就好明显望唔透呢个point）。ViuTV如果成功抢占咗某一部分网上用户嘅时间，对单靠网上平台嘅毛记嚟讲打击就更加大。

所以话，ViuTV会杀死嘅，点会系无线呀？毛记再转唔到身，创唔到新猷嘅话，就应该系咁先。（虽然林日曦好似话过执咪执啰，无咩特别。但请照顾一下每个星期都会追住《劲曲金曲》嘅毛粉呀老细﹗）

（本文纯属作者意见，不代表香港01立场。）