【溏心风暴3】唐文龙大赞夏雨好戏：“我真系畀佢闹到喊。”
无线50周年台庆重头剧《溏心风暴3》上集讲到正爸 (夏雨饰) 知道了女儿以爱 (陈敏之饰) 同人夫Nic (唐文龙饰) 一段不伦恋之后，就嬲到要揾Nic算帐，在公司召了Nic入房之后，即拍台兼爆粗，仲一手将杯奶茶兜口兜面泼向Nic。而戏玉就来到今晚播出呢集喇。正爸对Nic完全是感到震怒，泼完杯奶茶之后就连珠发炮咁闹爆Nic，全程都好激动，闹到出晒烟。而Nic就只是挨闹无驳嘴，还向正爸道歉。不过当然无办法扑熄正爸的怒火啦，正爸即场辞退Nic，仲好粗暴咁揪住Nic个心口掟他出房。
究竟唐文龙 (Michael) 当时被夏雨兜口兜面泼奶茶系咩感觉？总共又被泼了几多杯奶茶呢？杯奶茶热定冻㗎？香港01记者就电话访问了唐文龙，由他亲自讲述一下拍呢场戏的感受。他说：“𠮶杯奶茶系冻嘅，亦都走糖。夏雨哥系神级高手嘅演员，咁畀佢泼奶茶系我嘅荣幸。呢杯奶茶泼就泼咗一次，但系亦都加咗啲奶茶喺我头发同面度，因为要补shot。”原来被泼完仲要被淋多咁多次，好彩走糖啫，唔系搞到成身痴立立仲难受呀。
Michael又大赞夏雨的演技说：“夏雨哥就好好戏啦，所以佢一Take过就搞掂，在我嚟讲就系做反应，𠮶场戏我都唔系好多嘢讲，系最尾讲咗几句。同佢互动好开心，呢杯奶茶系我近呢11年嚟最好饮最好味嘅一杯走糖冻奶茶喇。夏雨哥真系过目不忘，无论个对白有几长，个情绪几有立体感嘅需求，佢都一样可驾驭得到，发挥得淋漓尽致。咁佢个正爸角色一直都系好友善，善解人意，好详和，但去到呢场戏佢突然之间爆炸喇。”
而Michael拍呢场戏时更是被夏雨闹到喊，他说：“夏雨哥佢𠮶种澎湃同爆炸力真系快过非洲𠮶只猎豹呀，咁佢出名好戏就唔需要讲啦。我当时同佢嘅互动系我入到房已经知道自己大祸临头，佢可以畀到𠮶个压力我，系令到我觉得胆怯，我真系畀佢闹到喊，佢好有压迫感，好强烈。呢个奶茶王辣嘅一面畀我见识到喇。奶茶王真系闹到我有情绪，闹到我流泪。杯奶茶系冻嘅，但系辣到去我嘅心头，辣到去我嘅胆量入面。”
现在回想起来，Michael觉得拍这场戏其实都几得意：“我哋都拍咗一段时间，因为要补shot啦，同埋因为啲奶茶干咗，咁又要再淋啲奶茶落啲头发同件衫度去补色啦。呢场戏连咗两集，所以我件衫同啲头发同埋挞奶茶啧都要连戏，都连咗好多场戏，每次都要淋奶茶喺个身同啲头发度，都几有趣，系个几好嘅回忆。真系一杯令人难忘嘅奶茶，好茶，好茶，奶茶王你好嘢！”
【溏心风暴3】48岁唐文龙点解可以咁fit？ 街头体能训练操到爆肌