【亚视熄机．博评】节目预告：翡翠老人台

近年愈来愈多年轻人唔理无线，加上忠实观众嘅年龄层随住年月向上移动，一直以稳守见称嘅无线，极有可能会顺势变佢做老人台，话晒又吸唔到年轻人，银发市场呢个电视market食得唔好嘥。

老人家都要睇电视，对免费电视嘅依赖仲高过好多后生仔㖭。当大家都期待住四月有新电视台睇，日日叫亚视折埋唔好献世嘅时候，你又有无谂过啲老人家真系想睇（当年仲有新节目推出嘅）亚视呢？随住四月嚟到，一定有大把人怀缅亚视光辉嘅岁月，不如今日我哋就估下四月新电视台开播之后，新电视新秩序，呢班年纪相对大嘅观众群会走去边啦。

翡翠骤变老人台

我估睇开亚视𠮶班老年观众，应该会畀翡翠台接收咗。当亚视喺大气电波消失（但系佢应该会喺世界存在多几年，有机会再讲），老品牌嘅广东话频道就只系剩低无线翡翠台。老人家见到认识嘅台，转过去睇嘅机会系好大嘅。而无线都一直做好部署，开咗啲啱老人家口味嘅节目。例如系阿姐同秋官主持嘅《靓声王》，仲有旦哥嘅《活得健康吗？》系列，摆明目标观众唔系年轻人。其实近年愈来愈多年轻人唔理无线，加上忠实观众嘅年龄层随住年月向上移动，一直以稳守见称嘅无线，极有可能会顺势变佢做老人台，话晒又吸唔到年轻人，银发市场呢个电视market食得唔好嘥。

ViuTV专攻后生仔　有线活力不再

你又唔好以为银发市场无人争㖞，你睇吓想当年好young嘅有线依家播紧啲乜？系汪曼玲嘅《星级会客室》呀，仲有司棋姐石修哥主持嘅饮食节目《食得有法“补”》。自己友唔捧（我觉得《为食情报局》两位女主持系几好），反而积极回收离巢嘅无线人，先后有张可颐、吴绮莉、杨思琦等等，就算只系贪方便就手，希望食尽呢班人嘅名气，都会唔觉意吸引咗一班当年钟意佢哋嘅观众。观众层老化，有线唔会睇唔到，如果唔系《星级会客室》点会来来去去都系访问以前嘅明星？分分钟仲系专登嘅。当ViuTV主攻后生，加上有线喺无乜钱嘅情况下，其实唯有继续食无线离巢明星嘅老本，想有线变返以前咁有活力、返老还童都几难。佢旗下嘅奇妙电视到依家都唔知去咗边，唔好话佢哋嘅方向见唔到，根本连个影都见唔到。

仲有只黑马系港台电视。本来都可以唔理佢嘅，但系唔知好彩定唔好彩，亚视嘅模拟广播将会由港台电视接手，有几多年长观众会唔转台无啦啦流去四平八稳嘅港台电视就要望实啦。

当然以上一切都系我断估，四月仲有一日就嚟到，到时睇吓开大定开细﹗我份人就最想大家都有电视睇，所以你哋唔好再话翡翠台不思进取喇，佢哋都系照顾老人家咋（好似系）。后生仔，你想睇啱你嘅嘢，睇其他台啰。

（本文纯属作者意见，不代表香港01立场。）