【亚视复活】亚视自由度大 朱慧敏：可以同其他传媒合作
撰文： 温菁莉
出版：更新：
正式在明年1月底复活的亚视，虽然今次以OTT网络电视示人，除了会播出过往亚视的经典节目之外，其实都有新嘢睇嘅。好似艺人方面，曾效力过TVB嘅朱慧敏，向海岚，曾华倩及王喜等人宣布加盟亚视。其中朱慧敏(Queenie)接受《香港01》访问时笑言自己好耐无试过开心到瞓唔著，“我琴晚嘅感觉好似小学生，听日要去旅行咁兴奋！”
去年5月离开TVB的Queenie指是因为受一班高层获邀加盟，“今次亚视嘅管理层都系以前系旧公司睇住我大，有啲甚至带我入行嘅人，佢地一邀请我立刻义不容辞，谂都唔洗谂即刻应承。”咁有义气当然系值得赞，咁酬劳方面又点呢？她笑言揾钱固然重要，“简直系开心价，但最重要系可以同一班咁有经验，对演艺事业咁有热诚嘅前辈共事，一定学到好多嘢。”至于合约方面Queenie就话自由度非常大，“以我为例今次系做节目主持人，但同时我可以同其他香港媒体合作拍剧咁。(收入大增？)其实系好开心，因为咁样先俾到演员同主持人空间。”她其后亦有透露新节目将于每周三与观众见面，同大家讲下扮靓心得！
有新将加入当然要有亚视旧将喇，就好似刘锡贤咁，对于今次亚视开机佢都好激动，“经历呢年几嘅时间，我发觉好多市民都好怀念亚视，见到我都问我亚视几时开台。”他指如果亚视去年唔系因为停播，自己亦为亚视服务了30年。其后提到去年亚视熄机，有不少艺人例如袁文杰，蔡国威等人纷纷加盟TVB，他闻言后就表示有同佢地讲过，“我成日都讲只要TVB肯放人，我地亚洲电视系无任欢迎同佢地合作，放人唔系话放走佢地，而系俾佢地同我地合作。”提到早前他在ViuTV拍摄《诡探》演技备受观众大赞，今次加盟亚视会否受影响，“今次份合约好清楚列明可以同其他传媒合作，所以唔会有障碍性。”