【吕丽瑶揭性侵．博评】报警由自己决定？刑事案唔只系当事人嘅事

#metoo 烧到嚟香港，唔令人意外。平时大家讲香港体坛香港艺人点高贵一回事，大家心中都知道香港唔会比外国干净。既然外国咁多丑闻，香港点会冇？即使吕丽瑶未出嚟爆大镬之前，大家都或多或少听过娱乐圈各种潜规则，或者中学个体育老师好多手啦，系咪？我中学都听埋好多体育老师故事，连张小娴都在《面包树上的女人》写过咸湿排球教练老文康啦。

吕小姐话斋，之前冇人爆过香港体坛嘅性丑闻，但佢相信有。我同你都知道有。佢做第一个出嚟讲嘅，当然要好大勇气——特别系，佢唔系退左役嘅运动员。体坛影圈好多嘢冇爆出嚟，都因为当事人仲要在个圈入面揾食。

但，吕小姐今次告白，完全示范咗而家网络嘅嘢，够晒出人意表，你完全估唔到事态点发展。回想一下，一个女仔高调出嚟讲自己多年前畀人性侵，正常得两种极端反应：

A：全城声讨淫贼，仆街咸湿佬咁L变态返去搞自己老母啦，起佢底就最啱。B：怪返个女仔转头，即系大家成日都听嘅Blame the victim。“系咪劳资纠纷咋？”“上得去人屋企预咗啦。”

唔使事后孔明，大家都估到，今次多数人都拣反应A。一来同当事人身份有关，你唔肯认都好，本地运动员形象当然正气。换著系个大陆援交少女话畀人侵犯，又会系另一回事。二来，正如上面都讲，唔少教练钟意睇女讲女摸女，真系人人都知。

原本你见主流言论都系反应A，上Facebook见到你啲朋友都系咁。当然系声讨教练，冇开名，但身份呼之欲出。屈臣氏田径会都话暂停佢职务，即系大家都知边位啦。

但，脱欧话你知，侵侵当选都话你知，主流传媒唔系全部，你个Facebook更加唔系全世界。唔使去啲好极端嘅网媒睇，就上连登睇下，包你大开眼界，几难听嘅说话都有，话佢拎光环又有，好工心计又有，R赞助都有，唔亲眼睇到真系唔信。

点解会咁？其中一个重点就系，当事人冇报警。唔止，警方揾佢，佢都唔想协助调查。咁就出事啦。

网友有个讲法，话呢啲性侵案男人好蚀底。因为大家都会未审先判，懒理法律上“未定罪都系清白”，个男人一定身败名裂——无论佢有冇做过。初步谂几有道理，教练已畀人停职，而有理由相信佢之后都几难再在呢行立足。好简单，你系阿妈，会唔会畀个女佢教先？我话知你在法律上无罪丫，答案一定系why take the risk？全香港得你一个神级教练？

大家睇得TVB睇得多，就唔使证据嘅，我对眼就证据。咩“未定罪仲系清白”，sorry, can't stop us公审。我又要司棋姐上身：呀教练如果真系清白嘅，做乜唔出嚟对质呢？退一万步，就算佢有做过，咁多年前嘅事，讲真都口同鼻拗，佢坚持话冇，又奈佢咩何呢？但教练自己似乎笠咗水，我知“未定罪仲系清白”，但难免畀人觉得佢真系有做，甚至系唔止一单——所以先唔出声由得件事淡化算，以免更多有证据嘅受害人企出嚟——反正受害人又冇话要告佢。

所以，就算你话网络公审，但教练又唔系死咗，大可以出嚟澄清。话当事人一面之辞对疑犯唔公平，似乎讲唔通。但撇除呢点，我都系唔多认同当事人坚决唔畀警察介入。

大把人日日闹法治已死，真系有人话“你仲觉得个司法制度可信咩？”“做乜要畀警察威？”，但我相信只系好少数人。一般人，照计唔会觉得司法制度黑暗到包庇个教练啩？衰啲讲句，“又唔系高官又唔系富二代又唔系政协”。所以你话法治已死报警都冇用，我好难理解。听日你屋企人畀人斩你报唔报警先？我就报啦。

另一个问题系，当事人提到，美国金牌体操选手McKayla Maroney畀佢勇气嘛——好啦，你估下McKayla个队医点先？Larry Nassar畀人拉咗上法庭受审，认埋罪。好多个受害人出嚟指证佢。既然受McKayla鼓励，做乜唔学埋呢part？唔止，受害人仲告埋美国体操队同密西根州立大学，民事诉讼，告疏忽。

系㖞，都要提醒大家，性侵犯系刑事罪，并唔系“当事人都话算啦关你班花生友乜事”。当然，实际上，当事人唔肯合作唔指证嘅，就好难起诉定罪了。但不妨反思下，如果“当事人都未出声关你乜事”成立嘅，做乜要有刑事民事之分？点解性侵要系刑事而唔系“真．劳资纠纷”？法律我识条铁，但律政司话我知，“刑事诉讼与民事诉讼的主要分别，在于前者是以香港特区的名义提出，借以遏止罪案和惩治罪犯”。

请注意，重点系，“遏止罪案和惩治罪犯”。我冇资格企道德高地，但现实系，刑事案唔系你同被告嘅事，系成个社会嘅事。

我当然明白，性侵案受害人要上庭，少不免会二次伤害。McKayla咁做唔等于人人都要咁做。而表面睇嚟，咁多年嘅事，冇其他证据，即使受害人上庭指证，似乎入到罪嘅机会唔高（有错请专家指证）。不过话说回头，你又点知受害人冇其他证据？

唔想咁煽情，但都系问下大家，如果受害人系你身边人，你又会点做？你都会叫受害人哑忍算？司法制度帮你唔到啦。吕小姐希望鼓励其他人企出嚟，但，即系上Facebook出个post但由得犯事嘅（如有做过）逍遥法外？

有人质疑我冇畀人性侵犯过，点会明白人地心情，好一个现代版嘅子非鱼。吕小姐选择唔要警方介入，我绝对可以理解，相信佢有佢嘅理由。但我就唔系好认同，而我亦唔相信唔认同佢唔报警，就等于伤害受害人。放心，香港刑事案系无限追溯期的，当事人随时可以改变主意。

（文章纯属作者意见，不代表香港01立场。）