【厨神出动】谢霆锋压轴现身米芝莲晚宴　大骚高速画花神技

要形容动作有几快，以前会话系“摩打手”，近年会话好似“叶问一打十”，来到2017年尾大家又可以学多一个新形容词：“谢霆锋整甜品咁快”近年专注钻研厨艺嘅谢霆锋，以七大星级名厨身份第二年受邀出席米芝莲晚宴。之前佢喺Facebook上载一段整甜品嘅片段，霆锋两只手分别拎住黑白色朱古力酱，以神速于甜品碟上在挤，快到无影，成段片几乎cap唔到一张唔松郁蒙嘅定格，认真夸张。

呢次米芝莲晚宴于澳门举行，7位名厨共拥有21粒米芝莲星星，而霆锋虽然无星，但佢系世界首位米芝莲之友荣誉嘅星厨，压轴出场绝对系理所当然。晚宴主题系“回忆”，霆锋喺Facebook上载嘅片段，正正就系整紧呢晚嘅甜品“蔷薇之约”亦即系“玫瑰泡芙及荔枝啫喱，玫瑰花瓣及香芹籽面包条”。霆锋于晚宴上即席挥毫展现甜品制作过程，以艺术涂鸦形式，急速随性绘制餐盘，效果就如毕加索一样睇唔明，配以激荡人心鼓乐，单系睇表演都值回票价。型就的确好型，但挤到成台成地都系朱古力酱，辛苦清洁人员啦。

入行超过20年登上无数大大小小舞台，不过霆锋就话自己呢次都非常紧张，因为首次制作500人份量食物，创作过程尝试过百次，特别提早5日到澳门熟习厨房。霆锋亦喺台上分享点解会拣选泡芙呢款甜品：“泡芙系我学做嘅第一款甜品，那时候听人说，泡芙是很难弄得好的一道甜品，我不相信就想挑战，于是上网看了制作过程，当下便去购买了食材，回家弄半天，弄出来的成果丑死了，那个对着一堆失败的泡芙哭笑不得的画面至今仍记得。”试咗咁多次之后，呢500份“蔷薇之约”当然靓靓登场，望住霆锋极专注chok爆表情，令人赏心悦目，份量虽少但足以饱晒。