【英国文化】教你听懂英式英语背后的真心话

礼貌是很抽象的概念，而每个国家对礼貌亦都有不同定义。跟日本人吃饭，你不先吃他们不吃，大家do-zo前do-zo后，僵持到地暗天昏都未有得食，礼貌对他们来说比吃饭重要；至于中国人，强调的是礼尚往来，你送给我然后我又送给你跟住你再送给我，送来送去送到临终前，还要辛辛苦苦吐出一句，“记住帮我买番盒花旗参畀陈仔”，才舍得安安乐乐去死，名副其实系“死都要回礼”。

英国人又如何？要我选，我必定会说英国人是全世界“最”有礼貌的民族，因为他们的礼貌是众所周知的惊吓级别，即是其他人口中的excessively polite。

香港人不但不会习惯这种excessive politeness，有时甚至是不明白。

刚刚有位家长跟我说，儿子去了英国一年，开始不懂得跟他沟通。“我开始唔系好知佢心入面谂紧乜。”家长这样一说，我有点担忧。她儿子去的学校叫St. Edwards Oxford，出名培育绅士，但家长一时又说不懂跟儿子沟通，一时又道不明所想，说到好像儿子中了降头，入了邪教一样。

佢突然成个人好似变到好优柔寡断。

点解呢？

问亲佢嘢，佢都话唔肯定。

例如？

问佢夜晚食上海菜好唔好，佢就话佢唔肯定佢想唔想食上海菜。

我开始有点头绪，不过还是想多听一个例子。

我买件衫畀佢，佢又话唔肯定呢个颜色啱唔啱佢。

听完佢咁讲，我终于明白。佢小朋友系用咗英式方法讲中文，简单嚟讲，即系用咗一口陶杰腔去讲中文。

我唔肯定，即系I am not sure。但当英国人讲I am not sure，佢哋意思绝对唔系“唔肯定”，而系啱啱相反，非常非常肯定，肯定到世界尽头咁肯定。I am not sure if I like that person，表面意思系“我唔肯定我钟唔钟意佢”，实际意思系there is not even a tiny bit of chance that I will like that person。看到吗？温婉的语气，柔和的措辞，从容的眼神，却是在表达内心的强烈不满，这就是英国人习以为常的自我抑压。

正正就是这等过了火位的自我抑压，让外地人都觉得英国人是excessively polite，最佳例子就是他们的sorry。英国人讲得最多就系sorry，系又sorry唔系又sorry。真系做错事就话要讲sorry啫，但佢哋系冇做错事都会同你讲sorry，甚至乎做错事𠮶个系你，佢都会同你讲sorry。我试过喺英国搭tube，唔小心踩到人只脚，我都未睇清楚自己踩到边位只脚，畀我踩𠮶个英国人已经同我讲I am sorry。

不过，要数真正病态的英式文化，就是英国人接受赞美的能力。

好简单，你试吓揾个英国人，然后同佢讲，哗，你条呔好靓㖞，你估佢会有咩反应？正常人都会讲句thank you，或者最基本都会微笑点头。但英国人听到人哋咁赞佢，不但唔会讲thank you，仲会好怕丑咁去否认。“我条呔靓？点会呀，好旧㗎喇，季尾减价货，不值一提啦。”

对于英国人来说，接受赞美已经是一件苦不堪言的事，若要他们自己赞自己，就更是妙想天开了。也因为这个原因，英国学生报读美国学校是一件很痛苦的事，因为美国学校的application essays便正正是要求学生吹嘘自己的成就和强项；要英国学生落笔赞自己，写到出年都未必呕到十个字出嚟。

那当然，有礼貌唔代表冇思想。对于绅士淑女来说，隐晦是作风，客气是习惯，内敛是修养。当你听到他们对你说you have made an interesting point，千祈唔好咁开心，佢哋实际上系想讲“你讲嘢唔好再废啲”。英国人嘛，唔话你猪兜，系费事你嬲。

（文章纯属作者意见，不代表香港01立场。）