转载《日本别府“化粪池温泉”，你敢唔敢浸？》

别府市内好多温泉，但全部都唔系大家心目中靓靓嘅露天温泉，要露天温泉，就入住贵贵嘅温泉酒店入先有，大部份市内温泉都好似下面张图咁，似个巨型化粪池。

黎到别府，有几样嘢系颠覆咗我认知嘅。

1.“地狱”唔系好辣咁解

香港有间专卖“别府地岳拉面”嘅连锁餐厅，令大家以为别府拉面好出名，对唔治，原来一直都系香港骑劫咗“地狱”两个字。“别府地狱”系讲别府市入面，8个唔同温泉口组成嘅旅游区，同八大温泉“别府八汤”嘅别称。日本好多时都叫火山口做地狱，因为长年喷烟加周边土地无养份，以致寸草不生，啲泥又重硫黄同铁变得又红又绿，成个地狱咁款。（北海道登别都有个火口地狱谷。）

香港就一声唔该拎咗“地狱”两个字做特辣拉面，但呢边其实系

一。间。地。狱。拉。面。都。无。

而且别府拉面系唔出名的，拉面店又少，甚至无辣嘢食，最有名其实系马肉刺身。香港人以为别府拉面好有名，就等于瑞士人系唔知咩叫瑞士鸡翼一样，去瑞士你系食唔到瑞士鸡翼嘅。咁讲系咪明晒？

2. 有种温泉　叫巨型化粪池

别府市内好多温泉，但全部都唔系大家心目中靓靓嘅露天温泉，要露天温泉，就入住贵贵嘅温泉酒店入先有，大部份市内温泉都好似下面张图咁，似个巨型化粪池。

平时温泉旁有花洒畀你冲凉之后入浴，再对唔治，呢度系无嘅，个个都系踎／坐响化粪池旁边，用个盆捞粪水先洗澡冲身，之前去过一个叫浜脇温泉嘅市内温泉都系一样模式。个款十足十大正时代个啲一镬熟銭汤（澡堂）多过温泉，不过銭汤系滚水，呢度系天然温泉水。不过佢个样令我有少少唔开胃，仲要个个温泉都好热，坐响入面10分钟连你只 ___（懒正经嘅女编辑话睇到不好意思，删掉一只字，自己估）都烚熟埋，我未试过浸温泉浸15分钟唔够就闪人。（图为区内非常有名的竹瓦温泉，入浴只需100円，山区个啲靓靓温泉就要过千円。）

3. 《别府之吻乜乜乜》是骗人的

细个见到好多咸片名都叫《别府之吻乜乜乜》，呢度系无嘅，呢个系列应该都系香港人独创，点解叫《别府之吻》而唔系《广岛之吻》或《冲绳之吻》（哗好浪漫）我就唔知了，但咸片戏院就有一间。相传因为别府系日本著名温泉区，有温泉就有三温暖，有三温暖就有风俗娘，所以有间成人映画馆配合其黄色事业发展，就好似汽车维修员有士巴拿一样咁合理。

呢间叫南映嘅咸戏院，建于昭和20年（即战后无耐，日本仔打完仗饱暖思兽欲好似系），距离而家已有差不多近百年历史。我好震惊，日本人保肉真系做得好好，望住香港咸片戏院一间一间咁执（你叫唔识上网嘅大叔情何以堪），咸片戏院竟然可以生存近100年，系100年！（好，100年其实系吹大咗，但其实间小戏院都有成70岁，已经拎到长者卡架喇！）而家有部叫《巨乳未亡人》之类上画，日日唔同，当然，同《别府之吻》系无啦“lung”嘅。

结语

大家以后去到别府就文明啲，唔好挂住揾地狱拉面店同睇《别府之吻系列》嘅咸片啦。

【编按：本文为特约转载，原文刊于作者Facebook专页。】

（本文纯属作者意见，不代表香港01立场。）