【后生仔倾吓偈】坤哥认FB专登打错字：“有时候系选择”

坤哥（吴业坤）最出名系咩？除咗出名“伪毒”之外，就梗系出名在经常性“打错字”啦。“食好西”“边度有女平”“边度有wife”相信呢几句潮语大家都听唔少，而网民仲非常贴心地帮坤哥出咗个“坤哥潮语录”添。虽然网民习惯都系“食住花生耻笑”而鲜少人会去深究点解坤哥佢会成日打错字，仲要唔止一次。不过最近呢集（11月16日）《后生仔倾吓偈》，坤哥喺节目入面亲身解话。“我头先就认咗，有时候系选择。”

“因为全部都系我personal facebook account，谂住全部都系自己朋友睇到。虽然朋友个list有5000人。（６号：你都好多friend㖞）我交友神手嚟。头几次我真系打错咗，因为我成日都系用速成。例如我唔识打个“西”字，就会打个“东”字。有时自己facebook𠮶度打错字，觉得几得意㖞，错咗咪唔改啰。”

虽然坤哥就帮自己打错字解释咗一轮，不过身为主持之一嘅六号明又点会咁轻易放过坤哥呢。“坤哥佢打中文都错得离谱，咩想‘约’人，变咗‘钓’人食饭。”然后坤哥又不厌其烦咁解释多一次，又系速成输入法的错。最抵死嘅系，连麦明诗都加入战团问埋一份。“有啲人话你第一次系错，第二次就系选择。”之但系坤哥又居然承认自己系专登㖞。“我头先咪认咗啰，我有时候系选择。边样分呢，因为我系喺自己facebook玩吖嘛。”麦明诗呢个时候就即刻插嘴话：“我都知你好多嘢玩嘅。”

节目尾段，突然讲大家fb搜寻纪录，坤哥被要求公开，他即在手机做手脚，最后显示冯盈盈三点式水著相，对于坤哥这一著，冯盈盈非常高兴，她说：“首先好多谢佢咁识货，呢张相𠮶景好靓，我唔系讲自己，佢骚我呢张相，其实符合返我喺节目嘅角色，人肉烟雾机，我唔喺度，梗系攞我出嚟啦，我哋同一个经理人，其实都好熟。”