彭于晏爆肌有段古　劲念旧低调行善赞助体操选手

提起彭于晏贵为男神，万千少女梦中情人，一身爆肌令女士爱慕男士羡慕，好多人第一时间会谂起《激战》入面嘅热血拳击手，不过对佢影响最深嘅作品，应该系6年前嘅电影《翻滚吧！阿信》，戏中佢要饰演一名体操选手，令佢形象180度转变，爆肌男神终于成形啦﹗而且Eddie原来仲好念旧，多年来默默赞助体育大学的体操选手。

刚出道嘅Eddie其实都系行白雪雪，文青小生路线，多数拍摄青春爱情戏，2011年，Eddie接下电影《翻滚吧！阿信》，一套讲述台湾体操选手故事，为咗演好呢个角色，彭于晏坚持练咗半年体操。每日朝早8点起身，跟体操队小朋友一齐训练、食同住，一星期练足6天，喺呢段时间Eddie只食水煮餐增加肌肉，每天苦练12小时锻炼、长时间倒立练习，由文弱书生变成44寸胸肌及体脂率仅6%嘅魔鬼筋肉人身材。佢嘅努力亦得到大家认同，凭住呢套戏佢创下自己演艺事业首个高峰，第一次入围金马影帝。

其后佢嘅戏路更阔，接落唔少亿元投资大制作，合作嘅都系影帝影后级人马，但原来多年嚟佢都无忘记过体操为佢带嚟嘅机会。《翻滚吧》系列来到第三部曲，工作繁重嘅Eddie都有抽空现身首映，体操教练林育信仲爆料话，Eddie抱以“是体操帮了他，所以他回馈体操”一直关心体操，唔单止每年买运动服赞助国家队选手，而且每个学期都赞助体大选手奖学金。

仲有2年前台湾“吊环王子”游朝伟，因腰伤需要紧急手术，正当为医药费一筹莫展时，Eddie同彭妈妈马上掏出10万新台币医疗费，仲叮嘱千万不要公开资助选手嘅消息。默默行善多时宜家先被公开，Eddie对赞助一事都只系谦虚表示：“能帮助需要帮助的人，没什么了不起，自己也透过这部电影成长，能尽一份力就尽一份力。”男神光环唔单止外表，直情系由内散发出嚟呀﹗