【午夜场】《雷神奇侠2》如果买咗飞睇第3集　咁呢幕一定要重温

《雷神奇侠》来到第3集，要讲佢好唔好睇，四个字︰脱胎换骨！以前奄奄闷闷的神话角色，吸引力一般，打斗场面系好睇，但略嫌太认真，唔似Iron Man咁轻轻松松又过关。不过第3集换上新导演，整个气氛你可以话低能咗，小学鸡咗，但又真系轻松咗、幽默咗，完全感受到神都系人的感觉。

今晚午夜场是讲《雷神奇侠2︰黑夜世界》内最后一幕，洛基被黑暗魔兵领袖捅死。话说在《复仇者联盟》中，作为邪神的洛基心术不正，想占领地球，但及早被复仇者联盟制止，最后被打到奄奄一息的洛基就交俾雷神带返去阿嘉斯。虽然邪不能胜正，但邪性不能移，洛基的邪念时有发作，即使来到第3集，都一样亦忠亦奸唔知佢边句真心。

在《雷神奇侠2︰黑夜世界》，被带返阿斯嘉的洛基依然深深不忿，不过呢集因为有强敌入侵，私事暂且放埋一边。而入侵的正正系雷神老窦奥丁，5000年前收拾的黑暗精灵界国王Malekith，他竟然卷土重来，国难当前，洛基都识分轻重，呢集都有出手相助，同哎呀大佬拍住上。去到最后洛基更被Malekith捅死，虽然大家都记得因为战事发生在另一宇宙关系，洛基最后系冇事的，不过细佬临别一幕就够晒动人，雷神喊晒口嗌到拆天想佢翻生都睇到人眼湿湿。

讲咁耐，点解要大家入场睇第3集前要Remind返呢幕？事关今集其中一个情节会有所呼应，而且呼应得相当精彩入肉，万一冇打呢个底，冇感觉冇印象的话，就真系会唔知睇咗啲乜。唔剧透咁多，入场你就知过瘾。