【最勤力孕妇】胡杏儿即将卸货　大肚靓相图辑任睇

近年愈来愈香港人会请专业摄影师，拍摄婚纱相家庭照仲有大肚相，留倩影等第时可以重温。被封为圈中最勤力大肚婆嘅胡杏儿预产期将至，终于肯停工休息，同朋友食下饭执下走佬袋，日前更分享了几张同丈夫李乘德拍摄嘅非一般孕照，主打黑白型格十足呀﹗

杏儿同老公分享咗几张新相，有别于一般大肚相sell温馨小清新feel，李生李太以全黑打扮上阵，杏儿著上单肩连身裙抱住孕肚，而李生就黑色西装上阵，佢哋企喺黑色布景面前背对背chok样望镜头，十足电影《史密夫斗史密妻》海报，型格十足！另一张相李生从后环抱杏儿，两个人面露幸福微笑，虽然就嚟生得，但杏儿手脚依旧纤廋，肥肚唔肥人认真系得天独厚。

另外佢哋又换上全白服饰，喺窗前柔和光线下，杏儿轻抱丈夫颈，两夫妇一齐望住肚入面嘅Baby Lee，期待囝囝出世后一家三口美满生活。而另一张杏儿一个人坐喺窗边轻抚孕肚，淡淡嘅笑容眼神流露出慈母光芒，就好似张智霖之前所讲：“杏儿变得温柔有妈妈样，好有女性光辉。”据知杏儿专诚揾嚟帮佢哋拍摄婚纱相以及婚礼嘅著名摄影师Ben操刀，之前啲相一出大获好评，难怪李生李太要encore啦。

被封为圈中最勤力大肚婆嘅胡杏儿，怀孕以嚟工作从未停过，跟住剧组到处宣传、又同胡说八道几位姐妹飞到澳大利亚拍旅游节目，见到又长途车又长途机，真系戥佢攰呀﹗不过亦因为不停工作，可以扮靓现身，杏儿孕期当中影落大量大肚靓相，一于同大家重温一下！