【G-1格斗会】拳手蔡嘉燕暗寸对手扮病：过百拳净系打眼

ViuTV真人骚《G1格斗会》去年播出时是非多多，但都叫有收视。第二季最近拍摄中，8名参赛中，个个都大有来头：洪拳、泰拳、田径教练、动作特技员，要数，最削果个一定系45岁嘅麦家琪同20岁嘅伪AV女麦紫莉Chili，对拳击完全零经验。

成队人早前去到日本训练兼进行赛事，第一日赛事中，Chili被对手打到起唔到身，随即嗌住咁被工作人员送到当地医院。第二日赛事，36岁蔡嘉燕对打27岁何慈恩，虽然前者有十年空手道造诣，但对手5岁已经开始学习洪拳，兼且系刘家良徒孙，呢场硬仗真系一啲都唔易打。

蔡嘉燕日前就喺facebook上载自己近照，只见佢两眼又肿又瘀，唔知真系以为做完割双眼皮手术：“记得比赛前一日，我哋一齐去滑浪，你不知是否因为不适应异乡天气，生病了！冇跟我一起去滑浪，一同享受，令我很担心，滑得很不畅快，到第二日比赛，发觉妳仲生猛过泥猛，复原能力好强，冇法了，唯有硬食妳三个ROUND ，头部中了过佰拳，争少少被KO ，放心我无脑震荡，只系眼荡荡，不过都算好，过百拳都净系打眼，都算就住！”字句间，似乎暗指对手扮病令佢留力，结果遭打到猪头咁。而蔡嘉燕在文中亦提到何慈恩同佢讲过“要俾人打先至识得还击”，但结果“上到台你冇手软还打得很主动”。之后更指可能因为无被打到起唔到身，所以工作人员未有为佢安排任何医疗，直到返港后自行入院检查。

唔少朋友见状后都戥蔡嘉燕不值，更指佢对人善良结果搞到自己周身伤，而为怕朋友担心，蔡嘉燕就回复大家表示“已经极速消肿！我是打不死无敌小神童！”