【拉斯维加斯枪击】古巨基身在案发附近劲慌乱：好多人嗌shooting

生死一线间讲就容易，但亲身经历过先会知几咁无助。美国拉斯维加斯Route 91 Harvest乡谣音乐节发生的枪击惨剧，一名枪手在酒店房向观众乱枪扫射，事件至今造成至少58死、500多人受伤。事发时古巨基同太太正身处枪击案附近，佢接受商台节目《在晴朗的一天出发》访问忆述经过时，仍然犹有余悸。

今日（3日）陈志云于节目中，致电身在拉斯维加斯嘅古巨基，他说：“早一晚我喺三藩市演出，第二日中午就同太太以及两位朋友一齐去到Las Vegas。咁啱入住嘅酒店就喺事发地点隔两间，事发时我地从室内通道返紧自己酒店，突然有好多人冲入嚟，情况好混乱，听到好多人大嗌有shooting（枪击），我地4个人就躲在赌台下面，当时好慌乱，完全唔知系边度出事，见到好多人走避，以为喺我地身处嘅地方发生。”基仔忆述时就好似回到事发时，把声都显得有啲震，明显感受到佢嘅恐慌同无助。

“陆续见到有人企起身，觉得躲在赌台下亦不大安全，开始陆续走，之后我地去咗酒店一条后楼梯，同我地一齐嘅仲有啲外国人同韩国家庭，大家都表现好紧张。电梯当时都被封锁，韩国家庭系住喺呢间酒店，解封后酒店工作人员带佢地上房，喺度好多谢佢地，肯带埋我地上去客房楼层。当时好多流言，话边度有炸弹枪手又去咗边度，只能靠手机留意最新消息。

我地喺走廊逗留咗一段颇长时间，过程中手机开始无电，因为朋友家人都开始打嚟我地keep住报平安，有啲外国人开房门借出佢地嘅充电器以及一啲被铺俾我地，担心我地要留过夜。之后我地联络到陈太陈淑芬当地嘅朋友，带咗我地去佢当地office，叫做终于有个地方可以容身比较安全。”从语气中亦听得出基仔呢一刻终于松一口气。

基仔接受电话访问时离开入住酒店，揾紧餐厅食饭，佢表示市面已经回复正常，𠮶几个钟内其实唔知事发情况系点，亦唔知自己身处嘅地方究竟安唔安全：“成个过程都好紧张，一直留意新闻，因为唔知枪手有几多个同有无疑犯走甩，事发时Las Vegas所有酒店都封锁晒唔俾进出。到差不多清晨5点步行返酒店，但老实讲个人要步出室外其实都好惊，直至5点几返到自己酒店房，先真正觉得自己安全啦，成整件事太概历时6个钟头。”

突然来到生死边缘，基仔亦道出最深感受：“当时唔知自己可以做咩，亦唔知之后会发生啲咩事。特别喺赌台下面时，我揽住太太，两个朋友喺旁边，当时唔知喺其他酒店发生，以为喺身处紧嘅地方有枪击，只能睇下大家做啲咩跟住做。返到酒店都唔系即刻瞓得着，情绪上仲未平伏，同埋都keep住留意事态发展，另外逐一向朋友家人报平安，佢地有问使唔使即刻安排返香港，但其实除咗Las Vegas所有酒店封锁，机场都系封锁咗，航班现时系大混乱，呢两日嘅交通人流都应该会好乱，要视乎返港航班情况先知几时返到香港。”

为咗令大家安心，基仔亦有到社交网站留言报平安“经历六个小时，清晨五时多才能回到酒店，才真正感到完全安全。昨晚，衷心感激Jenthew、Jason和协助我们最终安全回到酒店的几位人员。要感谢在后楼梯惶恐中仍答应把我们带上楼层的韩国一家人。感谢给我们水和毛巾的员工。感谢在我们藏身的楼层愿意借我们手机充电器和给我们被铺的外国人John和他太太。愿死者安息，伤者早日痊愈。愿不要再有暴力事件。”