戴耀明短讯向佘诗曼示爱　绿叶王好勇敢：话好挂住佢

绿叶王戴耀明同佘诗曼可以话除咗拍剧之外大缆都扯唔埋，有边个谂到原来戴耀明暗恋咗佘诗曼十几年，而且直至同女友分手之后终于有机会向阿佘示爱！预咗食柠檬，戴耀明接受《香港01》访问时依然大赞阿佘：“佢真系正爆，戏好人好，佢好似神一样，太完美！”

戴耀明同佘诗曼喺03年拍《金枝欲孽》时认识，继而暗恋阿佘，但呢段感情一直收埋喺戴耀明心里面。直至最近跟拍拖5年嘅圈外女友分手之后，感情冇着落，勾起咗佢对女神回忆的爱火，戴耀明喺一次饮酒之后，借醉以短讯向阿佘示爱：“我同佢讲如果将来揾到钱就娶佢做老婆，同埋话好挂住佢。”不过阿佘听完冇反应兼转话题，戴耀明亦冇再提起：“后来冇乜点，只系醉酒事啫，大家好朋友冇放喺心，我冇妄想过会同佢一齐㗎！不过到而家我都冇拍拖，我成年冇拍拖喇！”

问佢系咪同女友分手后觉得佘诗曼好啲所以向佢示爱，戴耀明就大笑：“brother，你讲到好似我有得拣咁嘅！”唏！爱情无分贵贱，刘浩龙同容祖儿都挞着啦！不过戴耀明真的视阿佘为女神：“太完美嘅嘢，远望系最好嘅！好似好多人喺教堂睇见神像一样，你只会去欣赏而唔会走近去掂佢。佢真系正爆，戏好人好，佢好似神一样，太完美！”甘唔甘愿做阿佘只兵呢？“佢唔系呢啲人，佢系好有义气、爽直、有爱心嘅人。”佢话好期望再同阿佘拍剧，就算有机会锡下面都开心。

佢强调同阿佘只系好朋友关系，但冇私人约会过，十几年嚟都只会约埋戚其义、黄德斌、周家怡、韦家雄等成班聚会。

戴耀明现时除咗喺TVB拍剧，最近打入内地市场，早前更喺内地电影《爆裂老婆三岁大》做男主角，又拍咗几套内地电视剧，而且收入好过TVB：“一有时间就会上内地拍下嘢，喺内地工作真系好开心，对我好好，多戏份，合理价，又识得尊重，有呢3点我相信已经冇嘢好投诉。”不过佢话有时会挂住香港，同埋自己曾经患焦虑症：“我年青嘅时候有焦虑症，坐坐下巴士因为太多人空气焗要即刻落车，又试过陪妈咪去多人嘅地方，突然呼吸唔到，依家好番啦！但仍然有担心嘅性格，有时打电话畀妈妈佢唔听，我又谂多咗，心谂唔系呀嘛，但可能佢只系大便。”