袁伟豪开live前女友岑杏贤突入　重提前情：最紧要向前行

袁伟豪去年底宣布跟岑杏贤分手，曾经喺颁奖礼喊晒多谢女友，最近终于放低旧情伤，承认同张宝儿拍拖，感情照睇都几稳定。不过今日袁伟豪同薛世恒齐齐开live𠮶阵，岑杏贤竟突然乱入，袁伟豪即时显得好紧张又关心，更重提一件鲜为人知嘅往事。

袁伟豪同薛世恒经常被指似样，所以今日一齐喺Big Big Channel开直播，畀观众睇下有几似样，同时玩咗几个二拣一游戏。

但系玩玩下，主持人发现有个叫Jennifer嘅网友出现，怀疑系岑杏贤，袁伟豪即刻好紧张咁靠前睇下主持人部手机，并好肯定咁讲：“系呀，真系佢嚟㖞！”又向住镜头同岑杏贤打招呼：“喂！hi Jennifer！你入嚟又真系要讲啲秘密出嚟，你唔介意呵？”哗突然有秘密要爆，系咪感情嘢先？

袁伟豪就话件事同薛世恒有关：“几年前我啱啱同Daniel（薛世恒）认识又同Jennifer认识嘅时候，Jennifer唔知Daniel系边个，纯粹系一个朋友嚟！有次Jennifer同Daniel讲：‘你好熟口面呀，你好似一个人，你好似陈法拉个老公啰！跟住Daniel话：‘我哋几个系朋友嚟！’（在场朋友）一个即刻缩低，一个打打下机就拧转面，跟住Daniel原本揸住啲嘢：‘我入厨房洗碗先。’讲到哈哈大笑。

薛世恒就苦笑：“我根本冇介意过任何嘢，𠮶下我感受唔到尴尬，只系感觉到气氛结咗冰啫！”袁伟豪继续讲：“后来话番畀Jennifer知，得啖笑啰！”然后好紧张睇下岑杏贤有冇睇紧：“离开咗未？”岑杏贤未离开但冇回应。

然后有网友赞袁伟豪好大方，袁伟豪就好正经咁提起跟岑杏贤嘅关系：“Jennifer就真系好大方，毕竟大家行咗一段时间，大家都好理解大家性格，最紧要向前行啦！都系想大家开心之嘛。”今次袁伟豪冇喊喇！不过讲讲下都睇下现任女友张宝儿有冇杀埋入嚟，好彩又冇啰！