【3日2夜】陈婉衡到游巴塞　与壮男打沙排　被无上装女郎抢锋头

TVB历来有好多旅游节目，近如澳门珠海，远至南极非洲喜马拉雅山，全个地球都差不多去匀，不过起用较新面孔，可以捧起一个又一个主持，仲做足百几集添食至第三辑，《3日2夜》可算近年最成功嘅旅游节目之一，最新一集有陈婉衡Alycia同大家去到巴塞隆拿，身为新一代TVB咪神，Alycia去到当地沙滩居然被一班无上装晒太阳嘅女士抢晒锋头，Alycia都话大开眼界：“有机会我都想试下﹗”

由第一辑起，Alycia已经主持过多集《3日2夜》，同观众畅游新加玻、纽西兰、曼谷、首尔，呢次去到出名热情奔放嘅巴塞隆拿，Alycia都拣咗一堆靓衫衬靓景，大部份都系露腰或低胸小背心：“自己都几钟意今次著嘅衫，大部份都系赞助，知我要去巴塞拣咗一堆适合当地嘅衫，另外有一两套就系当地即买即著。”不过佢都非常醒目，唔系怕入室内会冻，而系到圣家堂等庄严地方要遮一遮呀。

睇《3日2夜》又点会少得泳衣上阵呢，呢次去到圣马蒂区嘅沙滩，海岸线一直延伸至西班牙南部，Alycia身穿粉红色比坚尼享受阳光与海滩，仲落场同猛男齐齐打沙滩排球，都算有板有眼㗎。佢仲发现𠮶度有唔少女士都无上装晒太阳，“圣马蒂区嘅沙滩都有好多女仔无上装，因为佢地话费事晒到有泳衣痕，佢地话欧洲好普遍，自己私底下未试过。其实都想试但唔够胆喺人地面前试，可能将来有机会去个无人嘅岛，又或者villa得自己一个有个泳池，都可能会试下，不过拍摄就唔好啦会好怕羞。”

睇节目播出见Alycia同当地人打成一片，同打沙排嘅猛男揽揽，又同地下铁busking嘅男士一齐跳舞兼被锡手，咁有无艳遇先？“今次第一次去巴塞，当地嘅人真系好好好热情同好nice，即使唔识嘅都会走埋嚟好主动倾偈，识咗一啲朋友，有男有女交换咗ig，自己都钟意周围识朋友，第时有机会再去当地，或者佢地嚟香港可以再约下见面。”