【最紧要好玩．博评】TVB幕后人员：守旧高层处处操控，玩死节目

佢哋（旧派）嘅谂法系只需照顾𠮶班固有观众群，完全放弃新一代观众嘅需要。得罪讲句，电视业系畀佢哋搞死嘅。

2017年到依家过咗九个月，要数最难睇嘅本地制作电视节目，一定有无线《最紧要好玩》份，仲系三强。一班演员全力以赴去演绎一啲无二十年都有十年历史嘅“笑料”，伤害观众嘅眼球同大脑。

搞笑节目难度最高

做搞笑节目从来都系高难度动作，因为要食脑。想观众睇完识得笑，要贴住时代脉搏，仲要把握到大部份观众嘅感觉，先至会成功。呢样嘢真系唔系个个都够担挑战，《最紧要好玩》就系失败之作。睇牌面，有舞台剧界邓智坚拉埋一班演艺学院嘅师弟妹，再加埋一班无线演员做主力。以邓智坚喺舞台剧嘅表现嚟讲，喺今次节目所表现出嚟嘅质素明显有落差。到底出咗咩事大家都系得个估字。直到我收到来自一位有份制作呢个节目嘅人嘅PM。原来一切都系守旧嘅节目高层出事。

高层指令抄旧嘢

如果你“咁好彩”有睇呢个节目，你一定会觉得好大阵《欢乐今宵》味，原因系制作呢个节目嘅高层都系EYT出身。戴个头盔先，唔系话EYT出身就一定系因循守旧，但依照报料者所讲，佢哋十分为自己出身于EYT而骄傲，亦都继续拥抱紧呢个曾经风光一时嘅节目。明目张胆咁话要抄旧嘢，仲要讲明愈旧愈好。报料人话最离谱嘅一次，就系有人提议拎粤语长片嘅一段歌重拍！最后出到嚟，演员就以粤语片中人经典人物造型拍咗首《姑娘十八似花娇》，即系吕奇哥哥同宝珠姐唱“遥望青山绿水美如画”𠮶首。问你怕未？报料人话绝望时宁愿佢哋抄网上嘅笑话就算，但好可惜佢哋唔识笑。

另一个睇到我头都痕嘅位，就系啲演员用𠮶种挤眉弄眼夸张表情声线嘅“传统”喜剧表现手法。原来又系高层指定要咁做。你见几位来自演艺学院嘅演员扮小学生喺度朗诵，真系好似时光倒流三十年咁，我为佢哋感到尴尬又无奈。

死亡之吻　避得就避

节目嘅桥段同埋演出方法都向彻底溃烂嘅方向发展，幕前演员首当其冲，行先死先。有打滚江湖多年嘅演员本来答应咗拍三段故事，到拍之前收到剧本先知烂到不能接受，最后想推，但都要拍两段先甩到身。

另外，有队男子组合自告奋勇报名，想参与呢个节目恶搞自己嘅歌。不过就唔到呢个组合自己话事，改编歌词全权由大台负责，到佢哋收到改编歌词时，就因为太过低俗又唔好笑，同佢哋期望嘅效果相差太远，所以退出咗。

守旧为守住地盘？

大台近年唔少节目制作都有“复古”现象，今次《最紧要好玩》系个极端例子。报料人对呢个现象都有睇法，佢觉得关余咏珊入主嘅事。

自从余咏珊入主非戏剧分部之后，旧派被压榨萎缩紧，但就未被根除。呢班旧派对抗余咏珊嘅最大依据就系收视，为咗保住收视，佢哋会将节目嘅细节愈收愈紧。

结果旧派就用自己认为最成功而又最十拿九稳嘅招数去制作节目，《最紧要好玩》就复制《欢乐今宵》。呢个节目最初放喺周六夜晚2230 - 2300播，喺呢个收视死位有双位数字收视，令到呢个“复制EYT”方法一直影响住个节目，亦都由2017年2月开始一路折磨一班年轻啲嘅观众。终于喺最后五集，搬咗去周一至五2230播，先至真正挑起大众反响。不过每个节目都有佢嘅命，五集话咁快就过咗，守旧嘅节目制作高层可以撇除呢五集，以其他集数嘅成绩继续证明自己复制旧节目呢个方法系行得通嘅。

报料人话自己做呢个节目做到灰。“佢哋（旧派）嘅谂法系只需照顾𠮶班固有观众群，完全放弃新一代观众嘅需要。得罪讲句，电视业系畀佢哋搞死嘅。”

唉，我听到都觉得好灰呀，唔通要等到呢班人退晒休先有得救？

（文章纯属作者意见，不代表香港01立场。）