【奇妙电视】自家剧《闪婚100天》首播冇人知 无重温真系好脱节
喺香港要睇电视剧，来来去去都系TVB，ViuTV出产嘅《玛嘉烈与大卫》系列虽然评价不俗，可惜Viu剧集产量唔多。奇妙电视5月正式开台，大家记得嘅节目，来来去去都系《杜汶泽食住上》，新台宣传力度的确有点弱，弱到连第一套自家剧集《闪婚100天》已经首播，坊间都好似唔太多人知道呢件事……
呢套戏由廖亦崟(威廉)、郑融、吴耀汉、吴嘉龙、邹文正、李敏领衔主演，一共只有10集，每集大约一小时，系奇妙电视第一部自家制作的电视剧集，亦系《100天系列》第一辑。戏中郑融饰演嘅自由身女插画师黎海儿，遇上威廉饰演嘅阮彦廷然后闪婚，新婚生活过左甜蜜期后，二人开始发觉性格、习惯样样都南辕北辙，简单d嚟讲，有d似台剧爱情小品。
9月4号晚播第一集，节奏明快，好多时运用自然光拍摄，睇落几舒服，演员配搭几新鲜，原来郑融入行十四年，但担正拍剧都系第一次，孖住来自台湾嘅Lollipop@F成员威廉饰演一对，而邹文正、李敏分别饰演佢地两个嘅好友。主角住嘅地方又唔会大得离地，小巧精致，似返真正香港人住紧嘅窝居。
播出后上网睇番，评论唔算多，但大多以正评为主，有人话郑融献唱嘅主题曲<I’ll be with you>好好听，终于唔使下下得郑俊弘、吴若希、Hana；亦有人话“睇厌香港演员，希望威廉好像其他台剧男星一样给香港观众新鲜感。”。其实讲来讲去，都系睇TVB睇到闷，观众想有点新鲜感。
不过有个非常致命嘅弱点，来到2017年嘅今日，节目居然完全无安排网上或APPS可以重温，剧集喺晚上8点30分播出，重温时间系凌晨3点半，试问今时今日有几多香港人，可以喺呢两段时间坐定定睇播出呢。上埋官网睇睇，《闪婚100天》介绍，就系得咁多，相就得一张，加埋首主题歌，无啦，介绍下边个演员饰演咩角色都好呀……真心地，想支持下都不禁却步啦……
暂时无网上无APPS可以睇番套剧，唯有睇住Making of先啦……