喺ATV浪费15年时间？　袁文杰念旧：亚视薪水高好多

袁文杰演游生都过咗一段时间，但佢嘅人气依然不减，甚至认为袁文杰喺亚视服务咗15年系浪费青春，亦唔明白点解艺训班出身嘅佢当年唔受重用；其实委屈有时自己至知，今日袁文杰接受商台《一圈圈》梁泰来访问时，就爆喺训练班表现好又两个月接咗50几个骚TVB都唔要佢，迫于无奈至过档亚视。

游生袁文杰入行27年，1990年参加第4期艺员训练班，喺22名学员中只得6名被TVB选中签约成为艺员，冇袁文杰份，梁泰来就问佢知唔知原因？袁文杰有啲无奈：“问过艺员部𠮶两个月实习期间表现都唔差吖！两个月做咗50几个骚，训练班嚟讲我最多，点解唔签嘅？公司话可能经验仲未够啦！未成熟啦，不过唔紧要嘅，你改住特约演员先啦，维持番呢个兴趣，第时返嚟玩下啰！第时啲嘢第时先算啰！”袁文杰感慨讲：“会有啲失望，自问两个月尽晒力，每个月得几千蚊津贴。唔紧要，𠮶阵仲系好后生啫！呢铺唔中仲会有时间嘛，如果冇考过训练班我就冇呢个经验，亦都唔会入咗呢行，虽然我嘅路途比较转折啲。”

之后袁文杰唯有以特约演员身份做啲茄喱啡角色，亦有客串电影，《家有囍事》一直见唔到样嘅家明就系佢。期间亦做过其他工作，例如喺大型唱片连锁店做售货员，亦做过模特儿以及签约娱乐唱片公司，可惜唱片业低迷，经理人劝佢入亚视。

就系咁，袁文杰喺亚视做咗15年，唔红又唔黒，记得佢个样又唔记得佢做过乜，梁泰来指有人认为佢喺亚视15年系浪费青春，袁文杰就唔认同：“我好反感啲人用浪费字眼去形容，特别对于我嚟讲，喺呢个台我多谢制作人，不断有得做又叫有个位置，几稳定嘅收入。”佢仲好怀念亚视：“其实亚视份人工几好呀！比而家(TVB)高好多！啲人以为亚视冇收入薪水冇咁高，其实薪水系高好多㗎！”TVB识做啦！

但佢慨叹亚视毁喺王征手上：“我唔敢讲（王征累死亚视），不过同佢梗系有关！佢都几掂㗎真系，佢玩到咁样样，但佢开心之余又带唔到实质嘅嘢！其实王征年代有《星光大道》一班年青人出咗嚟，令以往稳重或者老气𠮶种形象完全改变晒！你只要掌握到呢班新血，再加埋有经验𠮶班艺人，所产生嘅作用你系估唔到嘅！点会倒退到收档嘅地步？你话系咪可惜吖？”

袁文杰始终醉心演艺事业，上年返TVB接拍第一套剧《不懂撒娇的女人》即人气急升，但佢话唔觉得自己红，只系想继续得到观众认同，希望TVB唔好再浪费咁好嘅人材啦！