【爸爸去哪儿】陈小春真人骚带4岁仔出镜　重金礼聘饼印仔曝光

陈小春同应采儿2010年结婚，2013年囝囝Jasper出世后，不时上载一家三口温馨生活照，不过一直都遮住Jasper个样唔俾佢曝光。呢日小春一反常态上载囝囝喺车上瞓觉嘅正面相，唔单止系相，小春原来仲接左大陆亲子真人骚节目《爸爸去哪儿》，节目肯定好落力去打动小春啦﹗

自2013年湖南卫视从南韩MBC电视台引进亲子户外真人骚《爸爸去哪儿》，曾经邀请林志颖、吴镇宇、刘烨等父子档参与演出，缔造出超高收视，广告收入数以忆元计，虽然去年内地广电总局发出《关于进一步加强电视上星综合频道节目管理的通知》文件，包括禁止炒作包装明星子女等条文，令《爸爸去哪儿》第四季改以于网上播放。

嚟到第五季成功打动陈小春俾囝囝曝光。已经四岁嘅Jasper原来同小春饼印一样，呢日喺福建平潭正式录影，从网民上载嘅相片睇到，小春同Jasper都戴上CAP帽，冒住大太阳上阵，Jasper个样同小春真系似到十足十，难得父子档开工，又或者怕囝囝唔太习惯面对镜头，喺拍摄现场小春对囝囝都照顾有加，不时为囝囝遮挡太阳。为左宣传节目，小春仲第一次放Jasper正面相到微博，相片Jasper喺车上瞓著左，非常可爱，网友都惊呼小春基因强大，更一度成为微博热门搜寻排第一位。

除左小春父子，呢次仲有刘畊宏、杜江、邓伦，不得不提系吴尊再次参与拍摄，今次仲一拖二，带住囡囡NeiNei同囝囝Max一齐参与演出。不过就有网友提起2014年，吴尊同NeiNei已经曾经参加拍摄，当中吴尊帮囡囡冲凉，播出时电视台无帮NeiNei重要部位打格，引发了唔少争议，希望呢次唔会再发生同类事件。